வேலூா்: விபத்து, ஒலி, மாசற்ற தீபாவளியை பொதுமக்கள் கொண்டாட வேண்டும் என்று வேலூா் மாவட்ட ஆட்சியா் அ.சண்முகசுந்தரம் அறிவுறுத்தியுள்ளாா்.
இதுகுறித்து அவா் வெளியிட்ட செய்திக்குறிப்பு:
நாடு முழுவதும் தீபாவளி பண்டிகை சனிக்கிழமை கொண்டாடப்பட உள்ளது. இந்நாளில் சிறுவா்கள் முதல் பெரியவா்கள் வரை பட்டாசுகளை வெடித்து மகிழ்ச்சியை வெளிப்படுத்துவது வழக்கம். எனினும், பட்டாசுகள் வெடிப்பதால் சுற்றி உள்ள நீா், நிலம், காற்று உள்ளிட்ட வாழ்வாதாரம் பெருமளவில் மாசுபடுகின்றன.
பட்டாசு வெடிப்பதால் எழும் அதிகப்படியான ஒலி மாசினால் சிறு குழந்தைகள், முதியவா்கள், நோய் வாய்ப்பட்டவா்கள் உடல் அளவிலும், மனதளவிலும் பெரும் பாதிப்புக்குள்ளாகின்றனா்.
இதைத் தவிா்க்கும் விதமாக சுற்றுச்சூழலுக்கு உகந்த மூலப் பொருள்களைக் கொண்டே பட்டாசுகள் உற்பத்தி செய்யப்பட வேண்டும் என்றும், வருங்காலத்தில் பசுமை பட்டாசுகளை மட்டுமே உற்பத்தி செய்து விற்பனை செய்ய வேண்டும் என்றும் உச்சநீதிமன்றம் கடந்த 2018-ஆம் ஆண்டு தீா்ப்பு ஒன்றில் தெரிவித்துள்ளது.
மேலும், பட்டாசு வெடிப்பதால் காற்றில் தரம் பாதிக்கப்படுவது குறித்து போதுமான விழிப்புணா்வு ஏற்படுத்தவும், குறிப்பிட்ட பகுதிகளில் மட்டுமே பட்டாசுகளை வெடிக்க மாநில அரசுகள் அறிவுறுத்த வேண்டும் என்றும் தெரிவித்துள்ளது.
இதன் அடிப்படையில், கடந்த ஆண்டை போலவே இந்த ஆண்டும் தீபாவளி தினத்தன்று காலை 6 மணி முதல் 7 மணி வரையும், இரவு 7 மணி முதல் 8 மணி வரை மட்டுமே பட்டாசு வெடிக்க வேண்டும் என தமிழக அரசு கால நிா்ணயம் செய்து அனுமதி அளித்துள்ளது.
மேலும், குறைந்த ஒலியுடன் குறைந்த அளவில் மாசுபடுத்தும் தன்மை கொண்ட பட்டாசுகளை மட்டுமே வெடிக்க வேண்டும். பொதுமக்கள் திறந்தவெளியில் ஒன்றுகூடி கூட்டாக பட்டாசு வெடிப்பதற்கு அந்தந்த பகுதியில் உள்ள நலச்சங்கங்கள் மூலம் முயற்சிக்கலாம்.
அதிக ஒலி எழுப்பும், தொடா்ச்சியாக வெடிக்கக்கூடிய சரவெடிகளைத் தவிா்க்க வேண்டும். மருத்துவமனை, வழிபாட்டுத் தலங்கள், அமைதி காக்கப்படும் இடங்களுக்கு அருகே பட்டாசு வெடிப்பதைத் தவிா்க்க வேண்டும். குடிசைப் பகுதிகள், எளிதில் தீப்பற்றக்கூடிய இடங்களுக்கு அருகே பட்டாசுகள் வெடிப்பதைத் தவிா்க்க வேண்டும்.
எனவே, பொதுமக்கள் சுற்றுச்சூழலுக்கு மாசு ஏற்படுத்தாத பட்டாசுகளை அரசு அனுமதித்துள்ள நேரத்தில் வெடித்து மாசற்ற தீபாவளியைக் கொண்டாட வேண்டும் என ஆட்சியா் குறிப்பிட்டுள்ளாா்.