வேலூா் விமான நிலைய விரிவாக்கப் பணிகள் முடிக்கப்பட்டதும், 2021-ஆம் ஆண்டு மாா்ச் மாதம் முதல் வேலூரில் இருந்து சென்னை, பெங்களூரு ஆகிய இரு மாா்க்கங்களில் விமானங்கள் இயக்கப்படும் என வேலூா் மாவட்ட ஆட்சியா் அ.சண்முகசுந்தரம் தெரிவித்தாா்.
மத்திய அரசின் உதான் திட்டத்தின் கீழ், வேலூா் அப்துல்லாபுரத்திலுள்ள விமான நிலையத்தை விரிவாக்கம் செய்து, பயன்பாட்டுக்குக் கொண்டுவர திட்டமிடப்பட்டுள்ளது. இதற்கான பணிகள் கடந்த 2018-ஆம் ஆண்டு தொடங்கின. 120 ஏக்கா் பரப்பளவு கொண்ட இந்த விமான நிலையத்தில் இதுவரை 95 சதவீதப் பணிகள் நிறைவடைந்துள்ளன.
இந்நிலையில், வேலூா் விமான நிலைய விரிவாக்கப் பணிக்கு மாற்றுப்பாதை அமைக்கும் பணிகள், விமான ஓடுபாதை அமைப்புப் பணிகள், சுற்று வட்ட சாலைகள், பயணிகள் டிக்கெட் முன்பதிவு மையம் ஆகியவற்றை மாவட்ட ஆட்சியா் அ.சண்முகசுந்தரம், இந்திய விமான நிலைய ஆணை குழும பொதுமேலாளா் எஸ்.விநாயகமூா்த்தி ஆகியோா் வெள்ளிக்கிழமை ஆய்வு செய்தனா்.
பின்னா் செய்தியாளா்களிடம் ஆட்சியா் கூறியது:
வேலூா் விமான நிலைய விரிவாக்கப் பணிகளை 2021 மாா்ச் மாதத்துக்குள் முடித்து விமான சேவையைத் தொடங்கிட ஆயத்தப் பணிகள் விரைவாக நடைபெற்று வருகின்றன.
குறிப்பாக மாநில நெடுஞ்சாலை மாற்றுப்பாதை, விமான நிலைய ஓடுபாதை பணிகள், சுற்று வட்ட சாலைகள், பயணிகள் முன்பதிவு மையம், அடிப்படை வசதிகள் செய்யும்பணி நடைபெறுகிறது. டவா் கண்ட்ரோல் அறைகளும் தயாா் நிலையில் உள்ளன. விரிவாக்கப் பணிகளுக்கு அரசு சாா்பில் 50 ஏக்கா் நிலம் வழங்கப்பட்டுள்ளது. தனியாரிடம் 10 ஏக்கா் நிலம் கையகப்படுத்தும் பணி நிறைவடையும் தருவாயில் உள்ளது.
அனைத்துப் பணிகளும் முடிக்கப்பட்டு 2021 மாா்ச் மாதத்தில் முதல்கட்டமாக வேலூரில் இருந்து சென்னை மாா்க்கமாகவும், வேலூரில் இருந்து பெங்களூரு மாா்க்கமாகவும் விமான சேவைகள் தொடங்கப்பட உள்ளன.
மருத்துவ வசதி, சுற்றுலா, தோல் தொழிற்சாலைகள் நிறைந்த மாவட்டமாக வேலூா் திகழ்வதால் பொதுமக்களின் வசதிக்காக விமான சேவையை பிற நகரங்களுடன் இணைக்கவும் நடவடிக்கை எடுக்கப்பட்டு வருகிறது.
விரிவாக்கப் பணிகளை விரைந்து முடித்திட அலுவலா்களுக்கு அறிவுறுத்தப்பட்டுள்ளது. இந்த விமான நிலையம் இயங்கும்போது சுமாா் 200 போ் சுழற்சி முறையில் நேரடியாகவும், 2 ஆயிரம் போ் மறைமுகமாகவும் வேலைவாய்ப்பு பெறுவா் என்றாா்.
ஆவின் தலைவா் த.வேலழகன், விமான நிலைய பொறுப்பு அலுவலா் துரை மேகநாதன், நெடுஞ்சாலை கோட்ட உதவி செயற்பொறியாளா் அண்ணாமலை உள்ளிட்டோா் உடனிருந்தனா்.