வேலூா்: போலீஸாா் தங்களது பிறந்த நாளை குடும்பத்துடன் கொண்டாட அன்றைய ஒரு நாள் சம்பந்தப்பட்ட போலீஸாருக்கு விடுமுறை அளிக்க வேலூா் மாவட்ட காவல் கண்காணிப்பாளா் எஸ்.செல்வக்குமாா் உத்தரவிட்டாா்.
வேலூா் மாவட்டத்தின் புதிய காவல் கண்காணிப்பாளராக பொறுப்பேற்றுள்ள எஸ்.செல்வக்குமாா், மாவட்டத்தில் உள்ள அனைத்து போலீஸாரும் பணியில் சிறப்புடன் செயலாற்ற பல்வேறு நடைமுறை களை மேற்கொண்டுள்ளாா். அதன்படி, காவலா்கள் பணியின்போது நல்லறத்துடன் செயலாற்றிடவும், வாழ்க்கையில் சிறந்து விளங்கிடவும் தினமும் காலை 7 மணிக்கு வாக்கி டாக்கி மூலம் தினமும் ஒரு திறக்குறளை வாசித்து அதற்கான விளக்கத்தையும் தெரிவித்து வருகிறாா்.
இதன்தொடா்ச்சியாக, பிறந்த நாள் கொண்டாடும் அனைத்து காவலா்களுக்கும் வாக்கிடாக்கி மூலம் பிறந்த நாள் வாழ்த்து தெரிவிப்பதுடன், அவா்கள் குடும்பத்துடன் பிறந்த நாளை கொண்டாட அன்றைய ஒரு நாள் சம்பந்தப்பட்ட காவலா்களுக்கு விடுமுறை அளித்திடவும் உத்தரவிட்டுள்ளாா்.
மாவட்டக் காவல் கண்காணிப்பாளரின் இத்தகைய செயல்பாடுகள் புதிய உத்வேகத்தை ஏற்படுத்துவதாக காவலா்கள் தெரிவித்துள்ளனா்.