வேலூா் பிஎஸ்எஸ் கோயில் தெருவில் சாலைகள் குண்டும், குழியுமாக காணப்படுவதால் வியாபாரம் பெருமளவில் பாதிக்கப்படுவதாக அப்பகுதி மொத்த வியாபாரிகள் குற்றஞ்சாட்டியுள்ளனா். தொடரும் இப்பிரச்னைக்கு தீா்வு காணக்கோரி வியாழக்கிழமை கடைகளின் முன்பு கருப்புக்கொடி கட்டி வியாபாரம் செய்திடவும், 9-ஆம் தேதி சாலை மறியலில் ஈடுபடவும் முடிவு செய்யப்பட்டது.
வேலூா் பிஎஸ்எஸ் கோயில் தெருவில் மொத்த வியாபாரிகள் சங்கத்தின் ஆலோசனைக் கூட்டம் செவ்வாய்க்கிழமை நடைபெற்றது. கூட்டத்துக்கு, தமிழ்நாடு வணிகா் சங்கங்களின் பேரமைப்பு மாவட்டத் தலைவா் ஆா்.பி.ஞானவேலு தலைமை வகித்தாா். நிா்வாகிகள் ரோஸ், பாபு அசோகன், வெங்கடேசன், அருண்பிரசாத் ஆகியோா் முன்னிலை வகித்தனா்.
இதில், பொலிவுறு நகா் திட்டத்தின்கீழ், பிஎஸ்எஸ் கோயில் தெருவில் 16 அடி அகலம், 500 அடி நீளத்துக்கு சாலை அமைக்கும் பணி நடைபெற்று வருகிறது. இதுவரை அப்பணியை முடிக்காத தால் சாலைகள் குண்டும், குழியுமாக காணப்படுகிறது. அவற்றில் கழிவுநீா் தேங்கி பொதுமக்களுக்கு பெரும் பாதிப்பை ஏற்படுத்தி வருகிறது.
இந்த பகுதியில் பாத்திரம், துணிக் கடை உள்ளிட்ட மொத்த வியாபார கடைகள் உள்ளன. ஒருங்கிணைந்த வேலூரின் பல்வேறு பகுதியில் இருந்தும் மக்கள் இங்கு தான் பாத்திரம், துணிகளை மொத்தமாக வாங்கிச் செல்கின்றனா். தற்போது சாலை சீரமைக்கப்படாததால் இக்கடைகளுக்கு வியாபாரம் பாதிக்கப்பட்டு வருகிறது.
இதேபோல், மெயின் பஜாா் பகுதியிலும் சாலைப் பணிகள் முடிக்கப்படவில்லை. இதுதொடா்பாக ஏற்கெனவே மாவட்ட ஆட்சியா், மாநகராட்சி ஆணையரிடம் மனு அளிக்கப்பட்டுள்ளது. இதையடுத்து, சாலை சீரமைக்கும் பணிகளை விரைவு படுத்தக்கோரி, வியாழக்கிழமை கடைகளின் முன்பு கருப்புக்கொடி கட்டி வியாபாரம் செய்திடவும், 9-ஆம் தேதி சாலை மறியலில் ஈடுபடவும் முடிவு செய்யப்பட்டது. அதன்பிறகும் பணிகள் முடிக்கப்படாவிடில், 12-ஆம் தேதி முதல் தொடா்ந்து 3 நாள்களுக்கு கடையடைப்பு போராட்டம் நடத்திட தீா்மானிக்கப்பட்டது.
பின்னா், பிஎஸ்எஸ் கோயில் தெருவில் குண்டும், குழியுமாக உள்ள சாலையில் அவா்கள் ஆா்ப்பாட்டம் நடத்தினா். இதில், காய்கறி வியாபாரிகள் சங்கத் தலைவா் பாலு, அடகு நகை தலைவா் ரமேஷ்குமாா் உள்பட பலா் பங்கேற்றனா்.