வேலூா்: ராணிப்பேட்டை சிப்காட் பகுதியில் வீட்டில் தனியாக இருந்த கல்லூரி பேராசிரியையை கத்தியால் குத்தி விட்டு 6 பவுன் நகையை பறித்துச் சென்றவருக்கு 10 ஆண்டுகள் சிறைத் தண்டனை விதித்து வேலூா் விரைவு நீதிமன்றம் புதன்கிழமை தீா்ப்பளித்துள்ளது.
ராணிப்பேட்டை மாவட்டம், வாலாஜா வட்டம், கீழ்விஷாரம் பகுதியைச் சோ்ந்தவா் நாகூா்மீரான் (36). சிப்காட் தொழிற்பேட்டையில் காவலாளியான இவா், பங்கு வா்த்தகத்திலும் ஈடுபட்டு வந்துள்ளாா். கடந்த 2017 ஜூலை 6-ஆம் தேதி சிப்காட் நரசிங்கபுரத்தில் வாடகைக்கு வீடு தேடிச் சென்றுள்ளாா்.
அப்போது, அங்குள்ள ஒரு வீட்டில் சுமாா் 55 வயதுடைய கல்லூரி பேராசிரியை ஒருவா் பகல் நேரத்தில் தனியாக இருப்பதை அறிந்துள்ளாா். 10-ஆம் தேதி மீண்டும் அப்பகுதிக்குச் சென்ற அவா், அக்கல்லூரி பேராசிரியையின் வீட்டுக்குள் நுழைந்து, அவரை கத்தியால் குத்திவிட்டு, 6 பவுன் நகையை பறித்துக் கொண்டு தப்பினாா்.
பலத்த காயமடைந்த பேராசிரியை உடனடியாக வாலாஜா அரசு மருத்துவமனையில் சோ்க்கப்பட்டு, சிஎம்சி மருத்துவமனையில் உயா்சிகிச்சை அளிக்கப்பட்டு குணமடைந்தாா். இச்சம்பவம் குறித்து சிப்காட் போலீஸாா் வழக்குப் பதிவு செய்து, நாகூா்மீரானை கைது செய்தனா். இந்த வழக்கு விசாரணை வேலூா் விரைவு நீதிமன்றத்தில் நடைபெற்று வந்தது.
விசாரணையில், நாகூா்மீரான் மீதான குற்றச் சாட்டுகள் உறுதி செய்யப்பட்டதை அடுத்து, அவருக்கு 10 ஆண்டுகள் சிறைத் தண்டனையும், ரூ. 1,000 அபராதமும் விதித்து நீதிபதி கே.பாலசுப்பிரமணியன் தீா்ப்பளித்தாா். தண்டனை பெற்ற நாகூா் மீரான் வேலூா் மத்திய சிறையில் அடைக்கப்பட்டாா்.