அரக்கோணம் இரட்டைக் கொலை: மேலும் இருவா் நீதிமன்றத்தில் சரண்

வேலூா்: அரக்கோணம் அருகே இரு இளைஞா்கள் கொலையுண்ட சம்பவத்தில் ஏற்கெனவே 7 போ் கைது செய்யப்பட்டுள்ள நிலையில், போலீஸாரால் தேடப்பட்டு வந்த மேலும் இருவா் வேலூா் நீதித்துறை நடுவா் மன்றத்தில் வியாழக்கிழமை சரண் அடைந்தனா்.

ராணிப்பேட்டை மாவட்டம், அரக்கோணத்தை அடுத்த சித்தாம்பாடி கவுதம் நகரில் கடந்த 7-ஆம் தேதி இரவு பெருமாள்ராஜபேட்டை, சோகனூா், செம்பேடு பகுதிகளைச் சோ்ந்த இரு பிரிவு இளைஞா்களிடையே ஏற்பட்ட தகராறில் சோகனூரைச் சோ்ந்த அா்ஜுன்(25), செம்பேட்டைச் சோ்ந்த சூா்யா (27) ஆகியோா் கொலை செய்யப்பட்டனா்.

இச்சம்பவம் தொடா்பாக இதுவரை பெருமாள்ராஜபேட்டையைச் சோ்ந்த அதிமுக தகவல் தொழில்நுட்பப் பிரிவு ஒன்றியச் செயலாளா் சத்யா(24), அஜித் (24), மதன் (37), சுரேந்தா் (19), நந்தா (20), சாலை கைலாசபுரம் கிராமத்தைச் சோ்ந்த காா்த்தி (20), பெருமாள்ராஜபேட்டையைச் சோ்ந்த சூா்யா (23) ஆகிய 7 போ் கைது செய்யப்பட்டுள்ளனா். மேலும் இச்சம்பவத்தில் தொடா்புடையவா்களை போலீஸாா் தேடி வருகின்றனா்.

இந்நிலையில், இந்த கொலைச் சம்பவம் தொடா்பாக பெருமாள்ராஜபேட்டையைச் சோ்ந்த சிவா (32), வேடல் பகுதியைச் சோ்ந்த விக்னேஷ் (23) ஆகியோா் வேலூா் நீதித்துறை நடுவா் (எண்.5) மன்றத்தில் வியாழக்கிழமை சரண் அடைந்தனா்.