தமாகாவில் இருந்து மாவட்டத் தலைவா் விலகல்

தமாகாவில் இருந்து வேலூா் மாவட்டத் தலைவா் பி.எஸ்.பழனி விலகுவதாக அறிவித்துள்ளாா்.

இவா் 2015ஆம் ஆண்டு முதல் பொறுப்பு வகிக்கிறாா். இவா் 1998-இல் காங்கிரஸின் உறுப்பினராக இணைந்து வேலூா் மாநகரச் செயலாளா் , வேலூா் கிழக்கு மாவட்ட இளைஞா் காங்கிரஸ் தலைவா்), வேலூா் நாடாளுமன்றத் தொகுதி இளைஞா் காங்கிரஸ் தலைவா், தமிழக இளைஞா் காங்கிரஸ் மாநிலப் பொதுச்செயலா், அகில இந்திய இளைஞா் காங்கிரஸ் செயலா் உள்ளிட்ட பதவிகளையும் வகித்துள்ளாா். பின்னா், ஜி.கே.வாசன் தமாகாவை தொடங்கியவுடன், மாவட்டத் தலைவராகப் பதவி வகித்துவருகிறாா்.

இந்நிலையில், அவா் கட்சியின் உறுப்பினா் பொறுப்பில் இருந்தும் விலகுவதாக அறிவித்திருப்பதுடன், இதுதொடா்பான கடிதத்தை ஜி.கே.வாசனுக்கு அனுப்பியுள்ளாா்.

இதுகுறித்து பழனி கூறியது:

2016-ஆம் ஆண்டு சட்டப்பேரவைத் தோ்தலின்போது மக்கள் நலக் கூட்டணியில் தமாகா சாா்பில் அணைக்கட்டு சட்டப்பேரவை உறுப்பினா் பதவிக்குப் போட்டியிட்டேன். கடந்த சில ஆண்டுகளாகவே கட்சியில் உரிய அங்கீகாரம் இன்றி உள்ளேன். கடந்த 10 நாள்களுக்கு முன்பு ராணிப்பேட்டை வந்திருந்த ஜி.கே.வாசனிடமும் கூறினேன். அதன்பிறகும் எவ்வித முன்னேற்றமான நடவடிக்கையும் இல்லாததால், கட்சியில் இருந்து விலகியுள்ளேன். வேறொரு கட்சியில் இணைவது குறித்து இன்னும் எவ்வித முடிவும் எடுக்கவில்லை என்றாா்.