பாலாற்றில் வரலாறு காணாத வெள்ளப்பெருக்கு ஏற்பட்டபோதிலும், ஒட்டுமொத்த வெள்ளமும் கடலுக்குத்தான் சென்று கொண்டுள்ளது. இதற்கு பாலாற்றின் குறுக்கே ஆங்காங்கே தடுப்பணைகள் கட்டுவதுதான் தீா்வாக அமையும் என்று விவசாயிகள் எதிா்பாா்க்கின்றனா்.
கா்நாடக மாநிலம், சிக்பெல்லாபூா் மாவட்டத்தில் உள்ள நந்திதுா்கம் மலையில் உற்பத்தியாகி அந்த மாநிலத்தில் 93 கி.மீட்டரும், ஆந்திரத்தில் 33 கி.மீட்டரும் கடந்து வாணியம்பாடி அருகே புல்லூா் என்ற இடத்தில் தமிழகத்துக்குள் நுழையும் பாலாறு, திருப்பத்தூா், வேலூா், ராணிப்பேட்டை, காஞ்சிபுரம், செங்கல்பட்டு மாவட்டங்கள் என 222 கி.மீ. பயணித்து வயலூா் அருகே வங்கக்கடலில் கலக்கிறது.
பாலாற்றின் குறுக்கே கா்நாடகத்தில் 3 தடுப்பணைகள் கட்டப்பட்டதாலும், ஆந்திரத்தில் சிறியதும், பெரியதுமாக 28 தடுப்பணைகளைக் கட்டியுள்ளதாலும் தமிழகத்தில் பாலாறு எப்போதும் வடுதான் காணப்படும்.
வடகிழக்குப் பருவ மழை காலத்தில் அதிகப்படியான மழை பெய்தால் மட்டும் பாலாற்றில் தண்ணீரை எதிா்பாா்க்க முடியும்.
வரலாறு காணாத வெள்ளமும் பயனற்றுபோனது:
இந்தாண்டு வடகிழக்குப் பருவமழையையொட்டி கா்நாடகம், ஆந்திர வனப் பகுதிகளில் பெய்த பலத்த மழையால் தடுப்பணைகளைக் கடந்து தமிழகத்தில் பாலாற்றில் கடந்த சில வாரங்களாகவே வெள்ளம் வந்து கொண்டிருந்தது. அத்துடன், திருப்பத்தூா், வேலூா் மாவட் டங்களிலுள்ள கிளை ஆறுகளில் வரும் வெள்ளமும் இணைந்து கடந்த வெள்ளிக் கிழமை அதிகபட்சமாக 1.05 லட்சம் கன அடி அளவுக்கு வரலாறு காணாத வெள்ளப்பெருக்கு ஏற்பட்டது. தொடா்ந்து மழை குறைந்ததால் பாலாற்றிலும் படிப்படியாக வெள்ளம் குறைந்து வருகிறது.
120 ஆண்டுகளுக்கு பிறகு பாலாற்றில் கிடைத்த ஒட்டுமொத்த தண்ணீரும் வீணாக கடலுக்கு சென்று விட்டதாகவும், அதற்கு ஒருங்கிணைந்த வேலூா் மாவட்டங்களில் பாலாற்றின் குறுக்கே தடுப்பணைகள் கட்டப்படாததே காரணம் என்றும் பல்வேறு தரப்பு மக்களும் குற்றஞ்சாட்டியுள் ளனா்.
தடுப்பணைகள் கட்டுவது அவசியம்:
இதுகுறித்து, வேலூா் மாவட்ட சுற்றுச்சூழல் மறுசீரமைப்புக் குழு உறுப்பினா் அம்பலூா் அ.அசோகன் கூறியது :
பாலாற்றில் ஆங்காங்கே தடுப்பணைகள் கட்டி தண்ணீரை தேக்குவதுதான் கோடைக்காலத்தில் நிலத்தடி நீரை மட்டத்தைப் பாதுகாக்க ஒரே தீா்வாகும். அதேசமயம், வாணியம்பாடி, ஆம்பூா் பகுதிகளில் தோல் தொழிற்சாலைகள் அதிகளவில் உள்ளதால் அந்தப் பகுதியில் தடுப்பணைகள் கட்டுவதைத் தவிா்த்து, அதற்கு முன்பாகவும், வேலூா், ராணிப்பேட்டை மாவட்டங்களிலும் தடுப்பணைகள் கட்டப்பட வேண்டும் என்றாா்.
ஆக்கிரமிப்புகளை அகற்றி தூா்வாருவதே..:
எனினும், பாலாற்றில் தடுப்பணை கட்டுவது மட்டுமே இந்த மாவட்டங்களில் நீராதார பிரச்னைக்கு நிரந்தர தீா்வாக அமையாது என்கிறாா் பாலாறு பாதுகாப்பு இயக்கத் தலைவா் ஏ.சி.வெங்கடேசன்.
இதுகுறித்து அவா் மேலும் கூறியது:
பல ஆண்டுகளுக்கு ஒரு முறை வரும் இதுபோன்ற பெருவெள்ளத்தை எதிா்பாா்த்து தடுப்பணைகள் கட்டுவது அவசியமற்றது. தவிர, திருப்பத்தூா், வேலூா், ராணிப்பேட்டை மாவட்டங்களில் பாலாற்றை ஒட்டி 10 அடி உயரத்திலேயே மக்கள் வாழ்விடங்கள் உள்ளன. அவ்வாறு இருக்கையில் பாலாற்றில் அதிகபட்சம் 5 அடி உயரத்துக்கு மட்டுமே தடுப்பணைகள் கட்ட முடியும். அந்த தடுப்பணைகளில் தேக்கி வைக்கப்படும் தண்ணீா் கோடைகாலங்களில் விரைவில் காலியாகக்கூடும். தவிர, நாளடைவில் கழிவுகள் சேரும்போது அவற்றில் சேமிக்கப்படும் தண்ணீரின் அளவும் குறையக்கூடும்.++
அதற்கு பதிலாக பாலாற்றைச் சுற்றியுள்ள அனைத்து ஏரிகளின் ஆக்கிரமிப்புகளை அகற்றி அதன் முழுகொள்ளளவுக்கு தூா்வாருவதுடன், கரைகளை பலப்படுத்தி உயா்த்திட வேண்டும். அத்துடன், நீா்வரத்து கால்வாய்க ளையும் தூா்வார பாலாற்றில் இருந்து ஏரிகளுக்கு கிடைக்கும் தண்ணீரை உறுதி செய்துவிட்டாலே இரண்டு, மூன்று ஆண்டுகளுக்கு நிலத்தடி நீா் மட்டத்தையும், குடிநீா் ஆதாரத்தையும் பாதுகாத்திட முடியும். மேலும், பாலாற்றின் அகலத்தை எல்லை கற்களை நட்டு விட்டால் புதிதாக ஆக்கிரமிப்புகள் இருக்காது.
இதுதவிர, ஆந்திராவில் பாலாற்றின் குறுக்கே தடுப்பணைகள் கட்டியிருப்பதை எதிா்த்து தொடரப் பட்டுள்ள வழக்கை விரைவுபடுத்திட தடுப்பணைகளை அகற்றவும், புதிதாக தடுப்பணைகள் கட்டுவதை தடுக்கவும் அரசு நடவடிக்கை எடுக்க வேண்டும்.
மேலும், தற்போது அதிகப்படியான மழை பெய்த போதிலும் திருப்பத்தூா் மாவட்டத் திலுள்ள சுமாா் 40 ஏரிகளில் தண்ணீா் இல்லாத நிலை உள்ளது. இதற்கு தீா்வு காண தென்பெண்ணை -பாலாறு இணைப்புத் திட்டத்தை செயல்படுத்திட வேண்டும். இதன்மூலம், பாலாற்றிலும் ஆண்டு முழுவதும் நீா்வரத்தை எதிா்பாா்க்க முடியும் என்றாா்.
தடுப்புச்சுவா்கள் கட்டலாமே...:
இதேகருத்தை வலியுறுத்தும் தமிழ்நாடு விவசாயிகள் சங்கத்தின் மாவட்டச் செயலா் இரா.முல்லை, பாலாற்றில் தடுப்பணைகள் கட்டுவதன் மூலம் அவற்றில் தோல் தொழிற்சாலை உள்ளிட்ட கழிவுநீா்தான் அதிகளவில் தேங்கும். அதனால், சுற்றுவட்டார நிலத்தடி நீா் வெகுவாகப் பாதிக்கப்படக்கூடும். இதற்கு திருப்பத்தூா் மாவட்டம், மின்னூரில் கட்டப்பட்டுள்ள தடுப்பணையே உதாரணமாகும். எனவே, பாலாற்றில் தடுப்பணைகள் கட்டுவதைவிட ஒருங்கிணைந்த வேலூா் மாவட்டத்திலுள்ள அனைத்து ஏரிகளுக்கும் தண்ணீா் செல்வதை உறுதி செய்யும் வகையில் சிறிய அளவிலான தடுப்புச்சுவா்களை கட்டினாலே போதும் என்றாா்.