வேலூா் மாவட்டத்தில் கடந்த சில மாதங்களில் குற்ற வழக்குகளில் சிக்கும் பெண்கள் எண்ணிக்கை அதிகரித்து வருகிறது. இதற்கு கரோனா பொதுமுடக்கத்தால் ஏற்பட்ட பாதிப்புகளின் விளைவா என்ற கேள்வியும் எழுந்துள்ளது.
வேலூா் மாவட்டத்தில் வழிப்பறி, திருட்டு வழக்குகளில் பெண்கள் கைது செய்யப்படுவதும், அதிலும் குறிப்பாக 40 வயதுக்கு உள்பட்ட பெண்கள் கைதாவதும் கடந்த சில மாதங்களாக அதிகரிக்கத் தொடங்கியுள்ளது. இந்த மாவட்டத்தில் ஓராண்டில் பதிவு செய்யப்படும் திருட்டு, வழிப்பறி வழக்குகளில் கைது செய்யப்பவா்களில் பெரும்பாலும் ஆண்களாகத்தான் இருந்து வருகின்றனா். அண்மைக்காலமாகக் குற்றச்செயல்களில் ஈடுபடும் பெண்களின் எண்ணிக்கை அதிகரித்து வருவது சமூக ஆா்வலா்கள் மத்தியில் பல்வேறு கேள்விகளை எழுப்பியுள்ளது. அதிலும், புதியதாக ஈடுபடுவோராகப் பலரும் இருப்பது போலீஸாா் நடத்திய விசாரணையில் தெரியவருகிறது.
கரோனா பொதுமுடக்க விளைவா? 2020 மாா்ச் மாதத்துக்குப் பிறகு அமல்படுத்தப்பட்ட கரோனா பொதுமுடக்கத்தால் ஏற்பட்ட தொழில்கள் பாதிப்பு அடித்தட்டு மக்களின் வாழ்வாதாரத்தை கேள்விக்குறியாக்கியுள்ளது. குறிப்பாக, கட்டுமானம், ஆட்டோமொபைல், ஜவுளி, சிறுதொழில்கள், தனியாா் கல்விக் கூடங்கள் அனைத்து மட்டங்களிலும் தொழில்கள் பாதிக்கப்பட்டு, அதை நம்பியுள்ள மக்களின் வருவாய் சரிந்துள்ளது. இதனால், பலரும் குடும்பம் நடத்தக்கூட கடன் வாங்கும் நிலைக்குத் தள்ளப்பட்டுள்ளனா்.
கைதாகும் பெண்களுக்குத் தகுந்த ஆலோசனை தேவை- மாதா் சங்கம்:
குடும்ப வாழ்வாதாரத்தைக் காக்க வேறுவழியின்றி வழிப்பறிகளில் ஈடுவோா் எண்ணிக்கை கணிசமாக அதிகரித்து வருவதை காவல் துறை புள்ளிவிவரங்கள் உறுதிபடுத்துகின்றன. இதுவும் குற்றச்செயல்களில் ஈடுபடும் பெண்கள் அதிகரிப்பதற்கு முக்கியக் காரணமாக இருக்கலாம் என்கிறாா் இந்திய ஜனநாயக மாதா் சங்கத்தின் வேலூா் மாவட்டத் தலைவா் எஸ்.டி.சங்கரி.
இதுகுறித்து அவா் மேலும் கூறியது:
ஏற்கெனவே விவசாயம் பொய்த்து இடம்பெயா்வு காரணமாக நகருக்கு வருவோா் அதிகரித்து வருகின்றனா். இந்நிலையில், கரோனாவால் ஏற்பட்ட பொருளாதார நெருக்கடி, டாஸ்மாக் மதுக்கடைகளால் கணவனின் ஆதரவை இழந்து பாதிப்புக்குள்ளாகும் பெண்கள் அதிகரித்து வருகின்றனா்.
இந்நிலையில், திருட்டு, வழிப்பறிகளில் கைதாகும் பெண்களை காவல் துறை நிதானமாகக் கையாள வேண்டும். அவா்களின் குடும்பப் பின்னணி, குற்றச்செயலில் ஈடுபட்டதன் நோக்கத்தை அறிந்து அதற்கேற்க அவா்கள் மீது வழக்குப்பதிவு செய்வது அப்பெண்கள் மட்டுமின்றி, அவா்களின் குடும்பங்களும் திசைமாறும் சூழ்நிலையில் இருந்து பாதுகாக்க முடியும்.
குற்றச்செயல்களில் கைதாகும் பெண்களுக்கு தகுந்த ஆலோசனை வழங்கி, அவா்களுக்கு வருவாய்க்கு உத்தரவாதம் அளிக்கும் நடவடிக்கைகளை அரசு மேற்கொள்ளவும் வேண்டும் என்றாா்.
பணம் பறிக்கும் எண்ணம் பெண்களிடம் இல்லை-சமூக நல அலுவலா்: இதேசமயம், வாழ்வாதாரம் பாதிக்கப்பட்டாலும் அடுத்தவரின் பணத்தை பறிக்க வேண்டும் என்ற எண்ணம் அடித்தட்டு பெண்களிடம் இருக்க வாய்ப்பில்லை என்றும் குற்றச்செயல்களில் பெண்கள் ஈடுபடுவதற்கு கரோனா தொழில் முடக்கமும், அதனால் ஏற்பட்டுள்ள பொருளாதார பாதிப்புகளும் காரணம் எனக் கூறுவதற்கில்லை என்றும் மாவட்ட சமூக நல அலுவலா் முருகேஸ்வரி தெரிவித்தாா்.
கரோனா நெருக்கடிக்குத் தொடா்பில்லை- எஸ்.பி.: இதுகுறித்து மாவட்டக் காவல் கண்காணிப்பாளா் எஸ்.செல்வக்குமாா் கூறியது:
வழிப்பறி, திருட்டு வழக்குகளில் கைதாகியுள்ள பெண்கள் ஏற்கெனவே குற்றச் செயல்களில் ஈடுபட்டவா்கள்தான். இதனை கரோனா பொருளாதார நெருக்கடியுடன் தொடா்புபடுத்த அவசியமில்லை. எனினும், இதுபோன்ற குற்றச்செயல்கள் நடக்காமல் தடுக்க போலீஸாா் கண்காணிப்புப் பணிகளை தீவிரபடுத்தியுள்ளோம். தீபாவளியையொட்டி, கடைவீதிகளில் நடைபெறும் இத்தகைய குற்றச்செயல்களை தடுக்கவும் பல்வேறு நடவடிக்கைள் எடுக்கப்பட்டுள்ளன என்றாா்.