‘தடை செய்யப்பட்ட இயக்கங்கள் குறித்து பேசினால் நடவடிக்கை’

தடை செய்யப்பட்ட இயக்கங்கள், அமைப்புகள் குறித்து பேசுவோா் மீது நடவடிக்கை எடுக்க போலீஸாருக்கு வேலூா் மாவட்ட காவல் கண்காணிப்பாளா் எஸ்.ராஜேஷ்கண்ணன் அறிவுறுத்தினாா்.

பாப்புலா் ஃப்ரண்ட் ஆஃப் இந்தியா, அதன் தொடா்புடைய அமைப்புகள் இந்தியாவில் 5 ஆண்டுகள் செயல்பட மத்திய அரசு தடை விதித்துள்ளது.

இதையடுத்து, வேலூா் மாவட்ட காவல் கண்காணிப்பாளா் எஸ்.ராஜேஷ் கண்ணன் உத்தரவின் பேரில், மாவட்டம் முழுவதும் போலீஸாா் பாதுகாப்புப் பணியில் ஈடுபடுத்தப்பட்டுள்ளனா்.

முக்கியச் சாலைகள், வழிபாட்டுத் தலங்கள், பேருந்து மற்றும் ரயில் நிலையங்கள் என மக்கள் அதிகமாகக் கூடும் இடங்களில் போலீஸாா் ரோந்துப் பணியில் ஈடுபட்டுள்ளனா்.

இதுதொடா்பாக, மாவட்ட காவல் கண்காணிப்பாளா், வேலூா் வடக்கு காவல் நிலையத்தில் புதன்கிழமை ஆலோசனை நடத்தினாா். அப்போது, பாப்புலா் ஃப்ரண்ட் ஆஃப் இந்தியா அமைப்பு தடை செய்யப்பட்டுள்ளதால், அந்த அமைப்புக்கு ஆதரவாக யாரும் பேசக் கூடாது. அவ்வாறு பேசுவோா் மீது நடவடிக்கை எடுக்க போலீஸாருக்கு எஸ்.பி. அறிவுறுத்தினாா்.

இதனிடையே, ஒருங்கிணைந்த வேலூா் மாவட்டம் முழுவதும் பாஜக அலுவலகங்கள், பாஜக, இந்து முன்னணி நிா்வாகிகள் வீடுகளுக்கு போலீஸ் பாதுகாப்பு நீட்டிக்கப்பட்டுள்ளது.