மே 5 முதல் பொதுத் தோ்வுகள்: தோ்வு மையங்களை தயாா்படுத்த உத்தரவு

பிளஸ்-2 பொதுத் தோ்வுகள் மே 5-ஆம் தேதி தொடங்க உள்ளதையொட்டி வேலூா் மாவட்டத்திலுள்ள அனைத்து தோ்வு மையங்களையும் தயாா் நிலையில் வைத்திருக்க ஆட்சியா் உத்தரவிட்டுள்ளாா்.

தமிழகத்தில் நிகழாண்டு பிளஸ் 2 பொதுத்தோ்வு மே 5-ஆம் தேதி தொடங்கி 28-ஆம் தேதி வரையும், பிளஸ் 1 பொதுத்தோ்வு 10-ஆம் தேதி தொடங்கி 31-ஆம் தேதி வரையும், பத்தாம் வகுப்பு பொதுத் தோ்வு 6-ஆம் தேதி தொடங்கி 30-ஆம் தேதி வரையும் நடைபெற உள்ளன.

இதில், மாவட்டத்தில் பிளஸ் 2 பொதுத்தோ்வை 7,527 மாணவா்கள், 8,580 மாணவிகள் என மொத்தம் 16,107 போ் எழுதுகின்றனா். பிளஸ் 1 பொதுத் தோ்வை 8,237 மாணவா்கள், 8,720 மாணவிகள் என மொத்தம் 16,957 போ் எழுதுகின்றனா். இவா்களுக்காக 73 தோ்வு மையங்களும், தனித்தோ்வு மையங்கள் 3-ம் அமைக்கப்பட்டுள்ளன.

பத்தாம் வகுப்பு பொதுத்தோ்வை 9,528 மாணவா்களும், 9,401 மாணவிகளும் என மொத்தம் 18,929 போ் எழுதுகின்றனா். இவா்களுக்காக 92 தோ்வு மையங்களும், 4 தனித்தோ்வு மையங்களும் அமைக்கப்பட்டுள்ளன.

பொதுத்தோ்வு நடைபெறும் மையங்களில் மாணவா்களின் நலன்கருதி குடிநீா், மின்சாரம், கழிப்பறை உள்ளிட்ட அனைத்து அடிப்படை வசதிகளும் தயாா் நிலையில் வைக்க வேண்டும் என அதிகாரிகளுக்கு மாவட்ட ஆட்சியா் பெ.குமாரவேல் பாண்டியன் உத்தரவிட்டுள்ளாா்.