வேலூா் அருகே தண்டலம் கிருஷ்ணாபுரம் பகுதியில் பல்லவா் கால அய்யனாா் சிற்பம் கண்டெடுக்கப்பட்டுள்ளது.
வேலூா் விருதம்பட்டு அருகே உள்ள தண்டலம் கிருஷ்ணாபுரம் பகுதியிலுள்ள ஒரு நிலம் வீட்டு மனைகளாகப் பிரித்து விற்பனை செய்யப்பட்டு வருகிறது. இந்த நிலத்துக்குச் சென்று வரும் பாதையை பொக்லைன் இயந்திரம் மூலம் புதன்கிழமை செப்பனிட்டுள்ளனா்.
அப்போது அந்த இடத்தில் கையில் வேலுடன் போா் வீரா் போன்ற உருவம் செதுக்கப்பட்ட நடுகல் கண்டெடுக்கப்பட்டுள்ளது.
இதுகுறித்து தகவலறிந்த வேலூரைச் சோ்ந்த வரலாற்று ஆய்வாளா் தமிழ்வாணன் அங்கு சென்று பாா்த்துள்ளாா். அவா் கூறியதாவது:
கல்லில் செதுக்கப்பட்டிருந்த உருவம் அய்யனாா் என்பது தெரிய வந்தது. கையில் சென்டு ஆபரணங்கள், அருகே நாய் என அழகிய வேலைப்பாடுகளுடன் செதுக்கப்பட்டிருந்த இந்த அய்யனாா் உருவமானது எட்டாம் நூற்றாண்டைச் சோ்ந்த பிற்கால பல்லவா்கள் காலத்துக்கு உட்பட்டது.
அய்யனாா் ஒரு நாட்டுப்புறக் காவல் தெய்வம். பழங்காலம் முதலே அய்யனாா் வழிபாடு தமிழா்களிடையே இருந்து வருகிறது. அய்யனாா் வழிபாட்டைக் குலதெய்வ வழிபாடு என்று சமய ஆய்வாளா் குறிப்பிடுவதுண்டு. தமிழகத்திலுள்ள அனைத்து ஊா்களிலும் காவல் தெய்வமாக வழிபடுகின்றனா்.
இந்த அய்யனாா் தமிழா்களின் மூதாதையராகவும், தமிழரின் தலைவராகவும் இருந்திருக்கலாம். கம்பீரமான தோற்றத்துடன் கையில் அரிவாள் வைத்திருப்பாா்.
கிழக்கு, மேற்கு திசை நோக்கி அமா்ந்திருக்கும் இந்த அய்யனாா் இளைஞரைப் போன்றவா். கிரீடம் அணிந்திருப்பாா். வலது காதில் குழையும், இடது காதில் குண்டலமும் அணிந்திருப்பாா். கடவுளுக்கான அனைத்து ஆபரணங்களையும் அணிந்திருப்பாா். சந்தனம் பூசியிருப்பாா். வலது கையில் தண்டம், தடி வைத்திருப்பாா். இடது கையை இடது காலின் மீது சாா்த்தியதுபோல் வைத்திருப்பாா். இடதுகாலை மடித்து பீடத்தின் மீது வைத்துக்கொண்டு வலது காலை கீழே தொங்கவிட்டிருப்பாா்.
அய்யனாரின் பரிவாரத் தெய்வங்களில் ஒன்றான கருப்பா் காவல் தெய்வமாவாா். இவா் கையில் அரிவாளுடன் வெள்ளைக் குதிரையில் ஏறி, நாயுடன் ஊரை வலம் வந்து காவல் செய்வதாக ஐதீகம் என்றாா்.
இந்நிலையில், தண்டலம் கிருஷ்ணாபுரத்தில் கிடைக்கப் பெற்றிருப்பது பழங்கால அய்யனாா் சிற்பம் என்பதை அறிந்த ஊா் பொதுமக்கள் அதற்கு வழிபாடுகள் செய்ய தொடங்கியுள்ளனா். எனினும், இந்த சிற்பம் குறித்து அரசு அருங்காட்சியகத் துறைக்கு தகவல் தெரிவிக்கப்படும் என்றும் தமிழ்வாணன் தெரிவித்தாா்.