பிரதமரின் அனைவருக்கும் வீடு திட்டத்தின் கீழ் வேலூா் மாவட்டத்தில் ஓராண்டுக்குள் 4 ஆயிரம் வீடுகள் கட்ட இலக்கு நிா்ணயிக்கப்பட்டுள்ளதாக மாவட்ட ஆட்சியா் பெ.குமாரவேல் பாண்டியன் தெரிவித்தாா்.
செய்தி -மக்கள் தொடா்புத் துறை சாா்பில் ‘ஓராண்டில் அரசின் அரும்பணிகளின் அணிவகுப்பு’ என்ற அரசின் வேலூா் மாவட்ட ஓராண்டு சாதனை மலரை மாவட்ட ஆட்சியா் பெ.குமாரவேல் பாண்டியன் சனிக்கிழமை வெளியிட, அதை மாவட்ட வருவாய் அலுவலா் கே.ராமமூா்த்தி பெற்றுக் கொண்டாா்.
பின்னா், ஆட்சியா் செய்தியாளா்களிடம் கூறியது:
தமிழக அரசின் அனைத்து திட்டங்களும் வேலூா் மாவட்டத்தில் ஓராண்டில் துறை வாரியாக சிறப்பாக முடிக்கப்பட்டுள்ளன. மேலும், நெடுஞ்சாலைத் துறை, ஊரக வளா்ச்சி துறை, நகராட்சி, மாநகராட்சி சாா்பில் பராமரிக்கப்படும் சாலைகளை மேம்படுத்தவும், உள்ளாட்சி அமைப்புகளுக்கு வந்து சேரும் குடிநீா் வசதியை அதிகப்படுத்தி, நாளொன்றுக்கு ஒரு நபருக்கு 130 லிட்டா் வழங்கிடவும் நடவடிக்கை எடுக்கப்பட்டு வருகிறது.
வேலூரில் புதிதாக கட்டப்பட்டு வரும் புதிய பேருந்து நிலையத்தை விரைவில் செயல்பாட்டுக்கு கொண்டுவர நடவடிக்கை எடுக்கப்படும். பொலிவுறு நகா் திட்டத்தை விரைந்து முடிக்கவும் அதிகாரிகளுக்கு உத்தரவிடப்பட்டுள்ளது.
காட்பாடி, வேலூா் தொகுதிகளில் ஏற்கெனவே விளையாட்டு அரங்கம் உள்ள நிலையில் மீதமுள்ள 3 தொகுதிகளிலும் சிறிய விளையாட்டரங்கம் அமைக்கப்படும். பென்லேண்ட் அரசு மருத்துவமனையை தரம் உயா்த்தவும், போ்ணாம்பட்டு, குடியாத்தம், மேல்பட்டி அரசு ஆரம்ப சுகாதார நிலையங்களை மேம்படுத்தபடுத்தவும் நடவடிக்கை எடுக்கப்பட்டுள்ளது.
காட்பாடி வட்டம், மகிமண்டலம் ஊராட்சியிலுள்ள சுமாா் 300 ஏக்கா் பரப்பளவில் தொழிற்பேட்டை அமைக்க ஏற்பாடு நடந்து வருகிறது. இவற்றில் 80 சதவீதம் தரிசு நிலமாகும். மீதமுள்ள 10 முதல் 15 சதவீத நிலம் மட்டுமே பயிா் செய்யப்படுகிறது. தகவல் தொழில்நுட்ப பூங்கா அமைக்கவும் அதிகாரபூா்வ அறிவிப்பு வெளியிடப்பட்டதை அடுத்து அதற்கான இடமும் தோ்வு செய்யப்பட்டுள்ளது.
கிராமங்கள் தோறும் வீட்டுமனை இல்லாதவா்களுக்கு இலவச வீட்டுமனை பட்டா வழங்க பயனாளிகள் தோ்வு நடைபெற்று வருகிறது. நீா்நிலை புறம்போக்குகளில் வசிக்கும் மக்களுக்கு வீடுகட்டித் தரவும், நிலம் இல்லாதவா்களுக்கு மாற்று இடத்தில் இடம் வழங்கி வீடு கட்டித் தரவும் ஏற்பாடு செய்யப்பட்டு வருகிறது. மேலும், ஊரக வளா்ச்சித் துறை சாா்பில் பிரதமரின் அனைவருக்கும் வீடு திட்டத்தின் கீழ் பட்டா உள்ளவா்களுக்கு ஓராண்டில் 3000 முதல் 4000 வரை வீடுகள் கட்டவும் இலக்கு நிா்ணயிக்கப்பட்டுள்ளது.
நகா்ப்புறங்களில் வீடு இல்லாதவா்களுக்கும், குடிசைப் பகுதிகளில் குடியிருப்பவா்களுக்கும் வாழ்விட மேம்பாட்டுத் துறை சாா்பில் வீடுகள் ஒதுக்கீடு செய்யப்படும். பொதுமக்கள் சொந்த வீடு வாங்குவதற்கு தமிழ்நாடு வீட்டு வசதி வாரியம் மூலம் குடியாத்தம் பகுதியில் மனை பிரிவு அமைக்கப்பட்டு குழுக்கள் முறையில் வீடு வழங்க அனுமதிக்கப்பட்டுள்ளது.
பள்ளிகொண்டா, போ்ணாம்பட்டு பகுதியில் உழவா் சந்தை அமைக்கவும், ஊரக வளா்ச்சி துறை, வருவாய் துறை, மகளிா் திட்டம், வேளாண்மைத் துறை, தோட்டக்கலை துறையை ஒருங்கிணைத்து மாதிரி கிராமங்கள் உருவாக்கப்படும். மக்களைத் தேடி மருத்துவம் திட்டத்தின் கீழ் மலைப் பகுதிகளில் 2 அல்லது 3 செவிலியா்கள் நியமிக்கப்பட்டு நோய்களுக்கு சிகிச்சை அளிக்கப்படும்.
காவல்துறை சாா்பில் மாவட்டம் முழுவதும் கண்காணிப்பு கேமரா பொருத்தப்பட்டுள்ளது. அனைத்து துறை அலுவலகங்களும் ஓராண்டு காலத்துக்குள் ஆன்லைன் மூலம் (இ-ஆபிஸ்) செயல்படுத்த நடவடிக்கை எடுக்கப்படும். மத்திய அரசின் உதான் திட்டத்தின் கீழ் வேலூரில் அமைக்கப்பட்டு வரும் விமான நிலைய விரிவாக்க பணிகள் விரைவுபடுத்த நடவடிக்கை எடுக்கப்படும் என்றாா் அவா்.
வேலூா் மாவட்டம் மூன்றாகப் பிரிக்கப்பட்ட பின்னா், இந்த மாவட்டத்தில் தனியாக சுற்றுலாத் தலம் இல்லை. அதனால், கோடை விழா நடத்தப்படுவது இல்லை என்று செய்தியாளா்கள் தெரிவித்தனா். அதற்குப் பதிலளித்த ஆட்சியா், வேலூா் மாவட்டத்தில் புதிதாக சுற்றுலாத் தலம் அமைக்க இடம் தோ்வு செய்யும் பணி விரைவில் தொடங்கப்படும். இந்தப் பணி நிறைவடைந்ததும் அடுத்தாண்டு கோடை விழா நடத்த நடவடிக்கை எடுக்கப்படும் என்றாா்.
மாவட்ட காவல் கண்காணிப்பாளா் எஸ்.ராஜேஷ் கண்ணன், வருவாய்க் கோட்டாட்சியா் பூங்கொடி, மருத்துவ பணிகள் இணை இயக்குநா் கண்ணகி, சுகாதாரப் பணிகள் துணை இயக்குநா் பானுமதி, உதவி இயக்குநா் (ஊராட்சிகள்) ராமகிருஷ்ணன், இணை இயக்குநா் (வேளாண்மை) மகேந்திர பிரதாப் தீட்ஷித் உள்ளிட்டோா் உடனிருந்தனா்.