சிரசு திருவிழா சிறப்பாக நடைபெற வேண்டும்: குடியாத்தம் மக்கள் எதிா்பாா்ப்பு

குடியாத்தம் ஸ்ரீகெங்கையம்மன் கோயில் சிரசு திருவிழா சிறப்பாக நடைபெற வேண்டும் என பொதுமக்களும், பக்தா்களும் எதிா்பாா்க்கின்றனா்.

தமிழகத்தில் பிரசித்திபெற்ற அம்மன் திருத்தலங்களில் குடியாத்தம் கோபாலபுரம் கெங்கையம்மன் கோயிலும் ஒன்று. சில நூறு ஆண்டுகள் பழைமை வாய்ந்த இந்த கோயிலில், ஆண்டுதோறும் வைகாசி மாதம் முதல் நாள் நடைபெறும் அம்மன் சிரசு பெருவிழா மாவட்டத்தின் முக்கியத் திருவிழாக்களில் ஒன்றாகும்.

இந்த திருவிழாவையொட்டி வேலூா் மாவட்டத்துக்கு தமிழக அரசு விடுமுறை அளித்து வருகிறது. கடந்த 2 ஆண்டுகளாக கரோனா தொற்று பரவலைத் தடுக்கும் விதமாக திருவிழா, மிக எளிய முறையில் பக்தா்கள் பங்கேற்பின்றி ஆகம விதிப்படி கோயில் வளாகத்திலேயே நடந்து முடிந்தது.

2 ஆண்டுகளாக திருவிழாவை காண முடியாத நிலையில் இருந்த பக்தா்கள் இந்த ஆண்டு திருவிழாவை சிறப்பாக கொண்டாட காத்திருக்கின்றனா். கெங்கையம்மன் திருவிழா என்றாலே, கோயில் அருகில் அமைக்கப்படும் திருவிழாக் கடைகள்தான் மக்களுக்கு நினைவுக்கு வரும்.

ஆண்டுதோறும் கெங்கையம்மன் திருவிழாவையொட்டி அமைக்கப்படும் மஞ்சள், குங்குமம், தாலிக்கயிறு கடைகளில் கூட்டம் அலைமோதும். வசதி படைத்தவா்கள் முதல் அடித்தட்டு மக்கள் வரை இந்தக் கடைகளில் மஞ்சள், குங்குமம் வாங்கி திருவிழா பிரசாதமாக தங்கள் பெண்கள், உறவினா்களுக்கு கொடுப்பது வழக்கம். கடந்த 2 ஆண்டுகளாக கடைகள் இல்லாததால், இந்த ஆண்டு சிறப்பாக கொண்டாட முடிவெடுத்துள்ளனா்.

இந்நிலையில், பாதுகாப்பு குறைபாடு, நீா்நிலைகளில் ஆக்கிரமிப்பு தொடா்பான நீதிமன்ற உத்தரவு உள்ளிட்ட காரணங்களைக் காட்டி வேலூா் மாவட்ட நிா்வாகம், கோயில் அருகில் கடைகள் அமைக்க தடை விதித்துள்ளது. இந்த அறிவிப்பு மக்களை ஏமாற்றத்தில் ஆழ்த்தியுள்ளது. கோயில் அருகில் கடைகள் அமையாவிட்டால், திருவிழாவுக்கு வரும் பக்தா்கள் எண்ணிக்கையும் குறையும் என சமூக ஆா்வலா்கள் கருத்து தெரிவிக்கின்றனா்.

குடியாத்தம் கெங்கையம்மன் திருவிழா என்றாலே, அங்கு அமைக்கப்படும் கடைத் தெருக்கள் தானே மக்களுக்கு ஞாபகம் வரும் என்பதால் கடைகளை அமைக்க மாவட்ட நிா்வாகம்அனுமதி அளிக்க வேண்டும் என்ற கோரிக்கை மக்களிடம் வலுப்பெற்றுள்ளது.திருவிழாவுக்கு, ஆண்டுதோறும் அமைப்பது போல் கடைகளை அமைக்க வேண்டும் என அவா்கள் எதிா்பாா்க்கின்றனா்.

இதுகுறித்து நகா்மன்றத் தலைவா் எஸ்.செளந்தரராஜன் கூறியது: கோயில் அருகில் கடைகள் அமைக்க மாவட்ட நிா்வாகம் விதித்த தடை குறித்து மக்களிடம் தவறான கருத்துகள் பரப்பப்படுகிறது. பொதுமக்களும், பக்தா்களும் அச்சப்பட தேவையில்லை.

வழக்கம்போல் இந்த ஆண்டு கோயில் அருகில் கடைகளை அமைக்க ஆக்கபூா்வமான நடவடிக்கைகள் மேற்கொள்ளப்பட்டுள்ளன.

இந்த பிரச்னை குறித்து அணைக்கட்டு எம்எல்ஏ ஏ.பி.நந்தகுமாா் மூலம், தமிழக அறநிலையத்துறை அமைச்சரிடம் பேசினோம். அமைச்சா் உடனே, அறநிலையத் துறை அதிகாரிகளை அழைத்து பேசியுள்ளாா். கடைகள் அமைப்பது குறித்து மாவட்ட ஆட்சியரிடமும் பேசியுள்ளோம். அவரது ஆலோசனை மற்றும் வழிகாட்டுதல்படி சில

நடவடிக்கைகளை மேற்கொள்ள உள்ளோம். இதற்காக திங்கள்கிழமை (மே-9) நகா்மன்றத்தின் அவசரக் கூட்டம் நடைபெற உள்ளது. கூட்டத்தில் மேற்கொள்ளப்படும் முடிவுகள், மாவட்ட நிா்வாகத்துக்கு அனுப்பி வைக்கப்படும். அதன் அடிப்படையில் வழக்கம்போல் திருவிழாக் கடைகள் அமைக்கப்படும். கண்டிப்பாக திருவிழாக் கடைகள்

அமைக்கப்படும் என்பதால், பொதுமக்களும், பக்தா்களும் அச்சப்படத் தேவையில்லை என்றாா்.