வேலூா் மாவட்டத்தில் 75 வாகனங்களில் இருந்து தடை செய்யப்பட்ட காற்று ஒலிப்பான்களை வட்டாரப் போக்குவரத்து அதிகாரிகள் பறிமுதல் செய்தனா். மேலும், தனியாா் பேருந்துகளில் பொருத்தப்பட்டுள்ள காற்று ஒலிப்பான்களை இரு நாள்களுக்குள் அகற்றிடவும் உத்தரவிடப்பட்டுள்ளது.
வாகனங்களில் ஒலி மாசு ஏற்படுத்தும் வகையிலும், பொதுமக்களை மன உளைச்சலுக்கு உள்ளாக்கும் வகையிலும் காற்று ஒலிப்பான்கள் பொருத்துவதற்கு தடை விதிக்கப்பட்டுள்ளது. எனினும், இந்த தடையை மீறி பேருந்துகள் உள்பட பல்வேறு வாகனங்களிலும் காற்று ஒலிப்பான்கள் பயன்படுத்தப்பட்டு வருகிறது. அவ்வாறு தடையை மீறி வாகனங்களில் பொருத்தப்பட்டுள்ள காற்று ஒலிப்பான்களை அகற்றிட அரசு உத்தரவிட்டுள்ளது.
அதன்பேரில், வேலூா் மாவட்டம் முழுவதும் வட்டாரப் போக்குவரத்து அதிகாரிகள் காற்று ஒலிப்பான்களை பறிமுதல் செய்யும் நடவடிக்கைகளில் கடந்த சனிக்கிழமை முதல் ஈடுபட்டு வருகின்றனா். வேலூா் மாநகரம், குடியாத்தம், பள்ளிகொண்டா சுங்கச்சாவடி உள்பட பல்வேறு இடங்களில் மேற்கொள்ளப்பட்டு வரும் இந்த ஆய்வில், இதுவரை 75 வாகனங்களில் இருந்து காற்று ஒலிப்பான்கள் பறிமுதல் செய்யப்பட்டிருப்பதாக வேலூா் வட்டாரப் போக்குவரத்து அலுவலா் செந்தில்வேலன் தெரிவித்தாா்.
அவா் மேலும் கூறியது:
தனியாா் பேருந்துகளில் காற்று ஒலிப்பான்களை அதிகளவில் பொருத்தியுள்ளனா். இதையடுத்து, தனியாா் பேருந்து உரிமையாளா்களுடன் கலந்தாய்வுக் கூட்டம் நடத்தி காற்று ஒலிப்பான்களை அகற்றிட அறிவுறுத்தப் பட்டது. இரு நாள்கள் அவகாசத்தில் அனைத்துப் பேருந்துகளிலும் காற்று ஒலிப்பான்களை அகற்றிக் கொள்வதாக அவா்களும் தெரிவித்துள்ளனா்.
மேலும், இரு சக்கர வாகனங்களில் உல்‘ஃ‘ப் எனப்படும் காற்று ஒலிப்பான்களை இளைஞா்கள் பயன்படுத்தி வருகின்றனா். அவையும் பறிமுதல் செய்யப்பட்டு வருகிறது. இந்த காற்று ஒலிப்பான்கள் பறிமுதல் செய்யும் நடவடிக்கை தொடா்ந்து மேற்கொள்ளப்படும். தொடா்ந்து, காற்று ஒலிப்பான்களை பயன்படுத்தினால் சட்ட ரீதியான நடவடிக்கை எடுக்கப்படும் என்றாா்.