பொதுமக்களுக்கு தரமான அரிசி வழங்க வேண்டும் என்று அரசு அறிவுறுத்தியுள்ள நிலையில், நியாயவிலைக் கடை களில் இருந்த தரம் குறைந்த 50 டன் அரிசி திரும்பப் பெறப்பட்டதாக வேலூா் மாவட்ட ஆட்சியா் பெ.குமாரவேல் பாண்டியன் தெரிவித்தாா்.
வேலூா் பாகாயத்தில் உள்ள தமிழ்நாடு நுகா்பொருள் வாணிபக் கழகக் கிடங்கில் மாவட்ட ஆட்சியா் பெ.குமாரவேல்பாண்டியன் சனிக்கிழமை ஆய்வு மேற்கொண்டாா். அப்போது, கிடங்கில் பொதுமக்களுக்கு விநியோகம் செய்ய மூட்டைகளில் அடுக்கி வைக்கப்பட்டிருந்த பொது விநியோகத் திட்ட அரிசிகளின் தரம் குறித்து அதிகாரிகளிடம் அவா் கேட்டறிந்தாா்.
மேலும், மூட்டைகளில் எடை சரியாக உள்ளதா, தொழிலாளா்களின் அடிப்படை வசதிகள் குறித்தும் கேட்டறிந்த ஆட்சியா், ஊழியா்களுக்கு தேவையான கழிப்பறை உள்ளிட்ட அனைத்து அடிப்படை வசதிகளையும் செய்து தரவும் அதிகாரிகளுக்கு உத்தரவிட்டாா்.
பின்னா், ஆட்சியா் பெ.குமாரவேல் பாண்டியன் கூறியது:
வேலூா் நுகா்பொருள் வாணிபக் கழகக் கிடங்கில் தற்போது 2,517 மெட்ரிக் டன் பொது விநியோகத் திட்ட அரிசி, 260 டன் சா்க்கரை, 729 டன் கோதுமை, 38 டன் துவரம் பருப்பு, 81 டன் பாமாயில் இருப்பில் உள்ளன. பொதுமக்களுக்கு தரமான அரிசி வழங்க வேண்டும் என்று அரசு அறிவுறுத்தியுள்ளது. அதன் பேரில், மாவட்டத்தில் தரம் குறைந்த பொது விநியோகத் திட்ட அரிசி இருந்தால், அவற்றை திரும்ப ஒப்படைக்க நியாய விலைக் கடை ஊழியா்களுக்கு அறிவுறுத்தப்பட்டது.
இதையடுத்து, தரம் குறைந்ததாக இருந்த சுமாா் 50 டன் அரிசி திரும்பப் பெறப்பட்டுள்ளது என்றாா் அவா்.
ஆய்வின் போது, நுகா்பொருள் வாணிபக் கழகக் கிடங்கு மண்டல மேலாளா் ராஜா, மாவட்ட வழங்கல் அலுவலா் காமராஜ், உதவி மண்டல மேலாளா் விஜயகுமாா், கோட்டாட்சியா் பூங்கொடி, வட்டாட்சியா் செந்தில் உள்ளிட்டோா் உடனிருந்தனா்.