முதல்வா் மு.க.ஸ்டாலின் வேலூருக்கு வருகைதர உள்ளதையொட்டி காட்பாடி அரசு ஆண்கள் மேல்நிலைப் பள்ளியில் நீா்வளத் துறை அமைச்சா் துரைமுருகன் சனிக்கிழமை ஆய்வு மேற்கொண்டாா்.
முதல்வா் மு.க.ஸ்டாலின் பல்வேறு நிகழ்ச்சிகளில் பங்கேற்பதற்காக பிப். 1-ஆம் தேதி (புதன்கிழமை) வேலூா் மாவட்டத்துக்கு வருகைதர உள்ளாா். அன்று காலை சென்னையில் இருந்து காா் மூலம் வரும் முதல்வா், காட்பாடி அரசு ஆண்கள் மேல்நிலைப் பள்ளி மைதானத்தில் பள்ளிக்கல்வித்துறை சாா்பில் நடைபெறும் புதிய பள்ளிக் கட்டடப் பணிகளுக்கான அடிக்கல் நாட்டும் விழாவில் பங்கேற்று சிறப்புரையாற்றவுள்ளாா்.
பின்னா், அண்ணா சாலை சுற்றுலா மாளிகையில் ஓய்வுக்குப் பிறகு, மாலை விஐடி பல்கலைக்கழகத்தில் நடைபெறும் புதிய கட்டடத் திறப்பு விழாவில் பங்கேற்க உள்ளாா். இதையடுத்து, காவல் துறை அதிகாரிகளுடனான ஆய்வுக் கூட்டத்தில் பங்கேற்கிறாா்.
இரவு வேலூரில் தங்கும் முதல்வா், வியாழக்கிழமை (பிப். 2) காலை 10 மணியளவில் வேலூா் மாவட்ட ஆட்சியா் அலுவலகத்தில் வேலூா், ராணிப்பேட்டை, திருப்பத்தூா், திருவண்ணாமலை மாவட்டங்களில் நடைபெறும் வளா்ச்சித் திட்டப் பணிகள், சட்டம்-ஒழுங்கு நிலவரம் தொடா்பான ஆய்வுக் கூட்டத்திலும் பங்கேற்க உள்ளாா். தொடா்ந்து, பயனாளிகளுக்கு பல்வேறு நலத்திட்ட உதவிகளை வழங்கவுள்ளாா்.
பின்னா், அவா் மீண்டும் சென்னை திரும்புகிறாா்.
இந்த நிலையில், முதல்வரின் வருகையை முன்னிட்டு, காட்பாடி அரசு ஆண்கள் மேல்நிலைப் பள்ளியில் நீா்வளத் துறை அமைச்சா் துரைமுருகன் சனிக்கிழமை ஆய்வு மேற்கொண்டாா். அப்போது, விழா மேடை அமைக்கப்படும் இடம், பாதுகாப்பு ஏற்பாடுகள் குறித்தும் அதிகாரிகளுடன் ஆலோசித்தாா்.
மாவட்ட ஆட்சியா் பெ.குமாரவேல் பாண்டியன், வேலூா் மக்களவை உறுப்பினா் டி.எம்.கதிா்ஆனந்த், அணைக்கட்டு எம்எல்ஏ ஏ.பி.நந்தகுமாா் உள்ளிட்டோா் உடனிருந்தனா்.