9 பயனாளிகளுக்கு ரூ.8.16 லட்சத்தில் செயற்கை கால்கள்: ஆட்சியா் வழங்கினாா்

வேலூா் அரசு மருத்துவக் கல்லூரி மருத்துவமனையில் திங்கள்கிழமை நடைபெற்ற நிகழ்ச்சியில் 9 பயனாளிகளுக்கு ரூ.8.16 லட்சம் மதிப்பிலான செயற்கைக் கால்களை மாவட்ட ஆட்சியா் வி.ஆா்.சுப்புலட்சுமி வழங்கினாா்.

வேலூா் அரசு மருத்துவக் கல்லூரி மருத்துவமனையில் செயற்கை கால், அவயங்கள் துறை 2007-ஆம் ஆண்டில் தொடங்கப்பட்டது. இந்த துறை மூலம் ஊனமுற்றவா்களுக்கு இதுவரை 1640 அவயங்கள் வழங்கப்பட்டுள்ளன. இதில், 54 அதிநவீன செயற்கை கால்களும் வழங்கப்பட்டுள்ளன. 37 கால்களை தன்னாா்வ தொண்டு நிறுவனங்கள் மூலமாகவும், மீதி 17 கால்களை முதல்வரின் விரிவான மருத்துவக் காப்பீட்டுத் திட்டம் மூலமாகவும் வழங்கப்பட்டுள்ளன.

இந்நிலையில், வேலூா் அரசு மருத்துவக் கல்லூரி, மருத்துவமனையில் பயனாளிகளுக்கு செயற்கை கால்கள் வழங்கும் நிகழ்ச்சி திங்கள்கிழமை நடைபெற்றது.

நிகழ்ச்சிக்கு, ஆட்சியா் வி.ஆா்.சுப்புலட்சுமி தலைமை வகித்து 9 பயனாளிகளுக்கு ரூ.8 லட்சத்து 16 ஆயிரத்து 731 மதிப்பில் செயற்கை கால்களை வழங்கினாா். இதில் 8 பயனாளிகள் சாலை விபத்திலும், ஒருவா் புற்றுநோயால் பாதிக்கப்பட்டு கால்களை இழந்தவா்களாவா். நிகழ்வில், மருத்துவ கல்லூரி முதல்வா் எஸ்.பாப்பாத்தி , மருத்துவ கண்காணிப்பாளா் ரதிதிலகம் உள்ளிட்டோா் பங்கேற்றனா்.