காவல் துறைக்கான பட்ஜெட்: ஏடிஜிபி ஆலோசனை - வேலூா் சரக டிஐஜி, 4 மாவட்ட எஸ்பி-க்கள் பங்கேற்பு

காவல் துறைக்கான தமிழக நிதிநிலை அறிக்கை தொடா்பாக கூடுதல் காவல் துறை தலைமை இயக்குநா் (ஏடிஜிபி - தலைமையிடம்) டேவிட்சன் தேவாசீா்வாதம் வேலூரில் வியாழக்கிழமை ஆலோசனை நடத்தினாா்.

இந்தக் கூட்டத்தில் வேலூா் காவல் சரக டிஐஜி, 4 மாவட்ட காவல் கண்காணிப்பாளா்கள் பங்கேற்றனா்.

தமிழக அரசின் 2024-2025-ஆம் ஆண்டு நிதிநிலை (பட்ஜெட்) கூட்டத் தொடருக்கு முன்பாக காவல் நிலைய பாரமரிப்பு, காவலா் குடியிருப்பு, அமைச்சு பணியாளா்களின் கோரிக்கைகள் அறிந்து அரசுக்கு அறிக்கை தாக்கல் செய்யும் வகையில் தமிழகம் முழுவதும் சரகம் வாரியாக ஆலோசனைக் கூட்ட நடத்தப்பட்டு வருகிறது.

அதன்படி, வேலூா் காவல் சரகத்துக்குட்பட்ட வேலூா், ராணிப்பேட்டை, திருப்பத்தூா், திருவண்ணாமலை ஆகிய 4 மாவட்டங்களில் காவல் நிலைய பாரமரிப்பு, காவலா் குடியிருப்பு, அமைச்சு பணியாளா்களின் கோரிக்கைகளை அறிவதற்கான ஆலோசனைக் கூட்டம் வேலூா் மாவட்ட காவல் அலுவலகத்தில் வியாழக்கிழமை நடைபெற்றது.

கூட்டத்துக்கு, கூடுதல் காவல் துறை தலைமை இயக்குநா் (ஏடிஜிபி - தலைமையிடம்) டேவிட்சன் தேவாசீா்வாதம் தலைமை வகித்தாா். வேலூா் சரக டிஐஜி சரோஜ்குமாா் தாக்கூா் முன்னிலை வகித்தாா். இதில், மாவட்ட காவல் கண்காணிப்பாளா்கள் என்.மணிவண்ணன், காா்த்திகேயன் (திருவண்ணாமலை), ஆல்பா்ட்ஜான் (திருப்பத்தூா்), கிரண் ஸ்ருதி (ராணிப்பேட்டை) உள்ளிட்டோா் கலந்து கொண்டனா்.

கூட்டத்தில், வேலூா் உள்பட 4 மாவட்டங்களில் உள்ள காவல் நிலையங்களில் மேற்கொள்ள வேண்டிய பராமரிப்பு பணிகள் உள்ளிட்டவை குறித்தும், அடுத்தாண்டு பட்ஜெட்டில் இடம்பெற வேண்டிய கோரிக்கைகள் குறித்தும் ஏடிஜிபி ஆலோசனை நடத்தினாா்.

கூட்டம் குறித்து காவல் துறை அதிகாரிகளிடம் கேட்டபோது, காவல் துறைக்கான தமிழக நிதிநிலை அறிக்கையில் மாவட்டங்களுக்கு ஒதுக்கீடு செய்யப்பட்ட கட்டடப் பணிகள் முடிக்கப்பட்டுள்ளதா, நிலுவையில் இருந்தால் அதற்கான காரணங்கள் குறித்தும் ஏடிஜிபி கேட்டறிந்தாா்.

மேலும், காவல் துறை வாகனங்களின் பயன்பாடு, தேவைகள் குறித்தும் கேட்டறிந்தாா். கடந்தாண்டு நிதிநிலை அறிக்கையில் ஒதுக்கீடு செய்யப்பட்ட தொகை முழுமையாக செலவிடப்பட்டதா அல்லது அரசுக்கு அந்த பணம் திரும்ப அனுப்பப்பட்டதா எனவும், அவ்வாறு பணம் திரும்ப அனுப்பியிருந்தால் அதற்கான காரணங்கள் உள்ளிட்ட விவரங்களையும் கேட்டறிந்தாா்.

வேலூா் மாவட்டத்தைப் பொறுத்தவரை மாவட்ட காவல் கண்காணிப்பாளா் அலுவலகத்தில் மின்தூக்கி வசதி செய்வது குறித்து கோப்பு அரசின் பாா்வையில் இருப்பது குறித்து தெரிவிக்கப்பட்டது என்றனா்.