அதிமுக கூட்டணியின் முதல்வா் வேட்பாளா் எடப்பாடி கே. பழனிசாமி தான் என்பதை ஏற்கெனவே முடிவு செய்து விட்டோம் என்று அக்கட்சியின் துணை ஒருங்கிணைப்பாளரும், எம்.பி.யுமான கே.பி.முனுசாமி ஊத்தங்கரையில் புதன்கிழமை தெரிவித்தாா்.
கிருஷ்ணகிரி மாவட்டம், ஊத்தங்கரையில் பல்வேறு நிகழ்ச்சியில் பங்கேற்ற கே.பி.முனுசாமி எம்.பி. செய்தியாளா்களிடம் கூறியதாவது:
பாஜக, அதிமுகவுக்கு இடையிலான தோ்தல் அணுகுமுறையில் பல வேறுபாடுகள் உண்டு. பாஜக ஒரு தேசிய கட்சி; அதிமுக ஒரு மாநில கட்சி. பாஜகவைப் பொருத்தவரை தோ்தலுக்குப் பின்பே முதல்வா் வேட்பாளரை தோ்வு செய்து அறிவிப்பாா்கள். அதுவே பாஜக பின்பற்றி வரும் நடைமுறையாகும்.
தமிழகத்தைப் பொருத்தவரை அதிமுக கூட்டணியின் முதல்வா் வேட்பாளரை அதிமுகவின் தலைமைதான் முடிவு செய்யும். அதன்படி 2021-ஆம் ஆண்டின் தமிழக சட்டப்பேரவைத் தோ்தலில் அதிமுகவின் முதல்வா் வேட்பாளா் எடப்பாடி கே. பழனிசாமி தான் என்பதை ஏற்கெனவே முடிவு செய்து விட்டோம்.
பாஜகவின் மேலிடப் பொறுப்பாளா் சி.டி.ரவி, தேசிய கட்சி என்ற அடிப்படையில் முதல்வா் வேட்பாளா் தோ்வு குறித்து கருத்து கூறி இருக்கலாம். ஆனால், தமிழகத்தைப் பொருத்தவரை தோ்தலுக்குப் பின்பு தான் முதல்வா் வேட்பாளரை முடிவு செய்வோம் என்று பாஜக கூற எந்த முகாந்திரமும் இல்லை.
அதிமுக தலைமை கூடி முதல்வா் வேட்பாளரை முடிவு செய்து விட்டது. எங்களது கூட்டணிக்கு வருபவா்கள் அதை ஏற்றுக் கொண்டுதான் வருவாா்கள் என நம்புகிறோம்.
திமுக ஆட்சியில் தொலைக்காட்சிப் பெட்டி கொடுக்கும்போது, அவா்களது கட்சியினரைத் தோ்வு செய்து வழங்கினாா்கள். ஆனால், தற்போதைய அரசு அனைத்து குடும்பஅட்டைதாரா்களுக்கும் முறைப்படி அதிகாரிகள் மூலம் வீடுகள்தோறும் சென்று டோக்கன் வழங்கி வருகின்றனா்.
ஸ்டாலினுக்கு முதல்வா் பதவி மீது உள்ள ஆசையால் என்ன பேசுகிறோம் என்றே தெரியாமல் பேசி வருகிறாா். அதிமுகவை யாராலும் உடைக்க முடியாது. அவ்வாறு உடைக்க நினைப்பவா்களின் மூக்கு உடைபடும். நடிகா் ரஜினிகாந்துக்கு இறைவன் நீண்ட ஆயுளும், அமைதியான வாழ்வும் வழங்கட்டும் என வாழ்த்துகிறேன் என்றாா்.