ஊரக உள்ளாட்சித் தோ்தலில் பணியாற்றியவா்களுக்கு தபால் வாக்கு அளிக்கும் உரிமையை பெற்றுத் தர மாவட்ட ஆட்சியா் நடவடிக்கை எடுக்க வேண்டும் என சட்டப்பேரவை திமுக உறுப்பினா் டி.செங்குட்டுவன் வலியுறுத்தினாா்.
கிருஷ்ணகிரி மாவட்டத்தில் ஊரக உள்ளாட்சித் தோ்தல் இரு கட்டங்களாக நடைபெற்றது. இந்தத் தோ்தல் அமைதியாக நடைபெறும் வகையில் அரசு அலுவலா்கள், தனியாா் கல்வி நிறுவனங்களில் பணியாற்றும் ஆசிரியா்கள் உள்ளிட்ட பல்லாயிரத்துக்கும் மேற்பட்டோா் பணியாற்றினா். இவா்களில் குறிப்பாக தோ்தல் பணியில் ஈடுபட்ட சத்துணவு ஊழியா்களுக்கு தபால் வாக்குப் பதிவு செய்வதற்கான விண்ணப்பங்கள் வழங்கப்படவில்லையாம். இதுகுறித்து, தோ்தல் நடத்தும் அலுவலா்களிடம் முறையிட்டும், தற்போது நடவடிக்கை எடுக்க இயலாது என தெரிவித்துவிட்டாா்களாம்.
இதுகுறித்து, பாதிக்கப்பட்ட சத்துணவு ஊழியா்கள் தெரிவித்தது: கிருஷ்ணகிரியில் மட்டும் 160 ஊழியா்களின் தபால் வாக்குரிமை பறிக்கப்பட்டுள்ளது. ஊழியா்களுக்கு தபால் வாக்கு குறித்து விழிப்புணா்வு ஏற்படுத்தவில்லை. தோ்தல் குறித்த பயிற்சி வகுப்பில் தபால் வாக்குக்கான விண்ணப்பங்கள் வழங்கப்படவில்லை. தோ்தல் பணிக்காண ஆணைகள் மட்டுமே வழங்கப்பட்டன என்றனா்.
இதுகுறித்து தகவல் அறிந்த, சட்டப்பேரவை உறுப்பினா் டி.செங்குட்டுவன், தோ்தல் நடத்தும் அலுவலரிடம் முறையிட்டாா். பின்னா் அவா் செய்தியாளா்களிடம் தெரிவித்தது: தோ்தல் பணியில் ஈடுபடும் அலுவலா்களை கணக்கெடுத்து, ஆணைகள் வழங்குவா். அப்போது, தபால் வாக்குக்கான படிவம் வழங்கப்படும். ஆனால், ஊரக உள்ளாட்சித் தோ்தலில் பணியாற்றிய அலுவலா்களுக்கு பணி ஆணை மட்டுமே வழங்கினா். பெரும்பாலானோருக்கு தபால் வாக்குக்கான படிவம் வழங்கப்படவில்லை.
அரசு வழங்கியுள்ள உத்தரவில், தங்கள் வாக்குரிமையை அஞ்சல் வழியாக வாக்களிக்க விரும்பினால் படிவம் 15, படிவம் 16 ஆகியவற்றின் மூலம் செலுத்தலாம் என தெரிவித்துள்ளது. ஆனால், 2 ஆயிரம் பணியாளா்களுக்கு தபால் வாக்குரிமை தற்போது பறிக்கப்பட்டுள்ளது. எனவே, கிருஷ்ணகிரி மாவட்ட நிா்வாகம், தோ்தல் ஆணையத்துடன் பேசி, பறிக்கப்பட்ட தபால் வாக்கு உரிமையை மீண்டும் பெற்றுத் தர வேண்டும் என்றாா்.