மகப்பேறு உதவித்தொகை வழங்கியதில் முறைகேடு நடைபெற்றதை கண்டறிந்து புகாரளித்த செவிலியா் மீது எடுக்கப்பட்டுள்ள நடவடிக்கையை ரத்து செய்ய வலியுறுத்தப்பட்டுள்ளது.
கிருஷ்ணகிரியில் பொது சுகாதாரத் துறையில் பணியாற்றும் கிராம சுகாதார செவிலியா்கள், பகுதி நேர சுகாதார செவிலியா்கள், சமுதாய சுகாதார செவிலியா்கள் கூட்டமைப்பின் ஆலோசனைக் கூட்டம் ஞாயிற்றுக்கிழமை நடைபெற்றது.
கூட்டமைப்பின் நிா்வாகிகள் லட்சுமி, அன்பரசி, தமிழ்மணி ஆகியோா் கூட்டுத் தலைமையின் கீழ் நடைபெற்ற இக் கூட்டத்தில் திருவண்ணாமலை மாவட்டச் செயலாளா் புனிதா, மாநிலத் துணைத் தலைவா் செல்வி உள்ளிட்டோா் பங்கேற்றனா்.
டாக்டா் முத்துலட்சுமிரெட்டி மகப்பேறு உதவித்தொகை இணையதளம் மூலம் பதிவேற்றம் செய்து, பயனாளியின் வங்கி கணக்கில் பணம் செலுத்தப்படுகிறது. இந்த நிலையில், கடந்த 2018-இல் சந்தூா், கல்லாவி, சிங்காரப்பேட்டை, ஜெகதேவி உள்ளிட்ட ஆரம்ப சுகாதார நிலையங்களில் மகப்பேறு உதவித்தொகை தவறான பயனாளிகளுக்கு சென்றுள்ளதாக ஆதாரங்களுடன் கிராம செவிலியா் நாகவேணி புகாா் அளித்தாா்.
கணினியில் இந்த விவரங்களை பதிவேற்றுவோா் செவிலியா்களின் கடவு சொல்லை பயன்படுத்தி, அவரது உறவினா்கள் உள்ளிட்ட சிலரது வங்கி கணக்கில் பணத்தை செலுத்தியுள்ளதாகக் கூறப்படுகிறது. இந்த நிலையல், செவிலியா் நாகவேணியை தற்காலிக பணி நீக்கம் செய்தும், மருத்துவ அலுவலா்கள், செவிலியா்கள் மீது எடுக்கப்பட்டுள்ள நடவடிக்கையை ரத்து செய்ய வேண்டும்.
இதுதொடா்பாக, கூட்டமைப்பு சாா்பில் ஜன.13-ஆம் தேதி துணை இயக்குநா் அலுவலகத்தில் பெருந்திரள் முறையீடு செய்வது, ஜன.24-ஆம் தேதி மாவட்டம்தோறும் துணை இயக்குநரிடம் பெருந்திரள் முறையீடு செய்வது என்பன உள்ளிட்ட பல்வேறு தீா்மானங்கள் இந்தக் கூட்டத்தில் நிறைவேற்றப்பட்டன.