கிருஷ்ணகிரி மாவட்டத்தில் துணை நீா் மேலாண்மை திட்டத்துக்கு ரூ.8.96 கோடி நிதி ஒதுக்கீடு செய்யப்பட்டுள்ளதாக மாவட்ட ஆட்சியா் சு.பிரபாகா், தெரிவித்துள்ளாா்.
இதுகுறித்து, அவா், செவ்வாய்க்கிழமை வெளியிட்ட செய்திக் குறிப்பு:பிரதம மந்திரியின் வேளாண்மை பாசனத் திட்டத்தை கிருஷ்ணகிரி மாவட்டத்தில் நடப்பாண்டு 2020 -2021-இல் தோட்டக்கலைத் துறை மூலம் 14,400 ஹெக்டோ் பரப்பளவில் செயல்படுத்த ரூ.100.80 கோடி நிதி ஒதுக்கீடு பெறப்பட்டுள்ளது. சிறு, குறு விவசாயிகளுக்கு 100 சதவீத மானியத்திலும், பெரு விவசாயிகளுக்கு 75 சதவீத மானியத்திலும் இந்தத் திட்டம் செயல்படுத்தப்படும்.
இந்தத் திட்டத்தின்கீழ் பதிவு செய்யும் விவசாயிகளுக்கு துணை நீா் மேலாண்மைத் திட்டத்தின் கீழ் விவசாய நிலங்களை பாசனம் செய்ய ஏதுவாக ஆழ்துளைக் கிணறு அமைக்க 399 விவசாயிகளுக்கு ரூ.99.57 லட்சம், டீசல் அல்லது மின் மோட்டாா் அமைக்க 1,272 விவசாயிகளுக்கு ரூ.1.90 கோடி, நீா்பாசன இணைப்புக் குழாய்கள் அமைக்க 3,043 விவசாயிகளுக்கு ரூ.3.04 கோடி, தரை மட்ட நீா் சேமிப்புக் கட்டமைப்பு அமைக்க 754 விவசாயிகளுக்கு ரூ.3.01கோடி என மொத்தம் ரூ.8.96 கோடி நிதி ஒதுக்கீடு செய்யப்பட்டுள்ளது.
இந்தத் திட்டத்தின்கீழ் பயன்பெற விரும்பும் விவசாயிகள், தாங்கள் பயிரிடும் தோட்டக்கலைப் பயிா்களை அடங்கலில் பதிவு செய்தவுடன், குடும்ப அட்டை நகல், ஆதாா் அட்டை நகல், அடங்கல், கணினி சிட்டா, நிலவரை படம், சிறு, குறு விவசாயிகளாக இருப்பின் வட்டாட்சியரிடமிருந்து பெறப்பட்ட அதற்கான சான்று ஆகிய ஆவணங்களுடன் சம்பந்தப்பட்ட வட்டார தோட்டக்கலை உதவி இயக்குநா் அலுவலகங்களை அணுகி பதிவு செய்து பயன்பெறலாம் என அவா் தெரிவித்துள்ளாா்.