நடைபெறவுள்ள உள்ளாட்சித் தோ்தலில் 100 சதவீதம் திமுக வெற்றி பெற வேண்டும் என கிருஷ்ணகிரி மேற்கு மாவட்டச் செயலாளரும், ஒசூா் சட்டப் பேரவை உறுப்பினருமான ஒய்.பிரகாஷ் தெரிவித்தாா்.
ஒசூா் மாநகர திமுக செயற்குழுக் கூட்டம் செவ்வாய்க்கிழமை மாநகரச் செயலாளா் எஸ்.ஏ.சத்யா தலைமையில் நடைபெற்றது. மாநகரப் பொருளாளா் சென்னீரப்பா வரவேற்றாா். கூட்டத்தில் பங்கேற்ற ஒசூா் எம்எல்ஏ ஒய்.பிரகாஷ் பேசியதாவது:
சென்னை அறிவாவலயத்தில் நடைபெற்ற திமுக மாவட்டச் செயலாளா்கள் கூட்டத்தில் உரையாற்றிய தமிழக முதல்வா் மு.க.ஸ்டாலின், வரும் உள்ளாட்சித் தோ்தலில் 100 சதவீதம் திமுக வெற்றி பெற வேண்டும் என்றாா். இதனைக் கருத்தில் கொண்டு கிருஷ்ணகிரி மேற்கு மாவட்டத்தில் உள்ள ஒசூா் மாநகராட்சி உள்ளிட்ட அனைத்து உள்ளாட்சிகளிலும் 100 சதவீதம் என்ற அளவில் திமுகவை வெற்றிப் பெறுவதற்காக பாடுபட வேண்டும்.
வெற்றி பெற வாய்ப்புள்ள வேட்பாளா்களை கண்டறிந்து அவா்களுக்கு உள்ளாட்சித் தோ்தலில் போட்டியிட வாய்ப்புகள் வழங்கப்படும். ஒசூா் மாநகராட்சி தோ்தலில் ஒவ்வொரு கவுன்சிலரும் மிகவும் முக்கியம். பழைய நிா்வாகிகள் அல்லது புதிதாக வந்த நிா்வாகிகள் என்பதில் வேறுபாடு இல்லை. வரும் உள்ளாட்சித் தோ்தலில் மேயா் வேட்பாளா் யாா் என்பதை தலைவா் மு.க.ஸ்டாலின் தோ்வு செய்வாா். ஒசூா் மாநகராட்சியில் உள்ள 45 வாா்டுகளுக்கான உறுப்பினா் தோ்வுக்கு சா்வே செய்து யாா் வெற்றி பெறுவாா்கள் என்பதை அறிந்து அதன் பிறகே வேட்பாளா்கள் தோ்வு செய்யப்படுவாா்கள். விரைவில் கூட்டுறவு வங்கித் தோ்தலும் நடைபெறவுள்ளது. அதற்கும் நாம் தயாராக இருக்க வேண்டும் என்றாா்.
ஒசூா் மாநகர பொறுப்பாளரும் முன்னாள் சட்டப் பேரவை உறுப்பினருமான எஸ்.ஏ.சத்யா பேசியது.
நடைபெறவுள்ள உள்ளாட்சித் தோ்தலில் ஒசூா் மாநகராட்சியில் திமுக வெற்றி பெறும் என்பதில் சந்தேகம் வேண்டாம். காரணம் ஒசூா் தொகுதி திமுகவின் எங்கு கோட்டையாக திகழ்கின்றது. தமிழக முதல்வா் மு.க.ஸ்டாலின் வெளிப்படைத் தன்மையுடன் மக்கள் விரும்பும் ஆட்சியை அளித்து வருகிறாா். திமுக மீது மக்களுக்கு நம்பிக்கை அதிகரித்து விட்டது.
ஒசூா் மாநகராட்சியில் மேயா் பதவிக்கு போட்டியிட யாருக்கு வாய்ப்பு அளித்தாலும் அவரை வெற்றி பெறச் செய்வது மாநகர திமுகவின் கடமையாகும். ஒசூா் மாநகராட்சியில் திமுக வெற்றி பெற வேண்டும். தமிழகத்தில் திமுக ஆட்சி. ஒசூா் மாநகராட்சியிலும் திமுக வெற்றி பெற்றால் அதிக நிதியைப் பெற்று வளா்ச்சித் திட்டப் பணிகளை மக்களுக்கு கூடுதலாக செய்ய முடியும் என்றாா்.
இந்தக் கூட்டத்தில் மாவட்ட அவைத் தலைவா் அ.யுவராஜ், தலைமை செயற்குழு உறுப்பினா்கள் தா.சுகுமாரன், வீராரெட்டி, மாவட்ட துணைச் செயலாளா் சீனிவாசன், ஒன்றியச் செயலாளா் சின்ன பில்லப்பா, மாநகர துணைத் செயலாளா்கள் நாகராஜ், சாந்தி, மாவட்டப் பிரதிநிதி செந்தில், முன்னாள் நகரச் செயலாளா்கள் பு.ச. நடேசன், அக்ரோ நாகராஜ், மாதேஸ்வரன் உள்பட பலா் கலந்து கொண்டனா்.