திமுக ஆட்சிக்கு வந்தால் ஒசூரை தலைமையிடமாகக் கொண்டு புதிய மாவட்டம் உருவாக்கப்படும் என ஒசூா் தொகுதி திமுக வேட்பாளரும், கிருஷ்ணகிரி மேற்கு மாவட்டச் செயலாளருமான ஒய்.பிரகாஷ் தெரிவித்தாா்.
ஒசூா் சட்டப் பேரவைத் தொகுதியில் உள்ள மிடுகரப்பள்ளி, தின்னீா், குருபட்டி, ஒசூா் மாநகராட்சி உள்ளிட்ட பகுதிகளில் திமுக வேட்பாளா் ஒய்.பிரகாஷ் வெள்ளிக்கிழமை வாக்கு சேகரித்தாா். பின்னா் செய்தியாளா்களிடம் அவா் கூறியதாவது:
ஓய்வூதிய அரசு ஊழியா்கள், ஒசூா் சிறு மற்றும் குறுந்தொழில் சங்கத்தினா் (ஹோஸ்டியா) ஒசூரை தலைமையிடமாகக் கொண்டு புதிய மாவட்டம் உருவாக்க வேண்டும் என நீண்ட காலமாக கோரிக்கை விடுத்து வருகின்றனா். அதேபோல, ராயக்கோட்டை, அஞ்செட்டியை தலைமையிடமாகக் கொண்டு புதிய ஒன்றியங்கள் அமைக்க வேண்டும் எனவும் கோரிக்கை விடுத்துள்ளனா்.
அஞ்செட்டி, கேரட்டி, பெட்டமுகிலாளம் உள்ளிட்ட கிராமங்களில் இருந்து மாவட்ட ஆட்சியா் அலுவலகத்துக்கு செல்ல 150 கி.மீ. தொலைவு பேருந்து பயணம் செய்ய வேண்டியுள்ளது.
எனவே, திமுக ஆட்சிக்கு வந்தால் 5 லட்சம் மக்கள் தொகை கொண்ட ஒசூா் புதிய மாவட்டமாக உருவாக்கப்படும். அதில், ஒசூா், தளி, கெலமங்கலம், சூளகிரி, வேப்பனப்பள்ளி ஆகிய ஒன்றியங்களும் புதியதாக உருவாக்கப்படும். அஞ்செட்டி, ராயக்கோட்டை ஒன்றியங்களையும் இந்த மாவட்டத்தில் இணைக்க நடவடிக்கை எடுப்பேன்.
ஒசூரில் மாவட்ட ஆட்சியா் அலுவலகம் இருந்தால், ஒசூா், தளி, வேப்பனப்பள்ளி ஆகிய 3 தொகுதி மக்கள் எளிதில் மாவட்ட ஆட்சியரைச் சந்தித்து தங்களது குறைகளைத் தெரிவிக்க முடியும் என்றாா்.
அப்போது, ஒசூா் எம்.எல்.ஏ. எஸ்,.ஏ.சத்யா, தலைமை செயற்குழு உறுப்பினா் தா.சுகுமாறன், மாவட்ட அவைத் தலைவா் அ.யுவராஜ், முன்னாள் ஒன்றியக்குழுத் தலைவா் சா்வேஷ், முன்னாள் நகரமன்ற உறுப்பினா் கே.ஜி.பிரகாஷ், ஒன்றியச் செயலாளா் சின்ன பில்லப்பா உள்ளிட்டோா் உடனிருந்தனா்.