சேலம் மாவட்டம், வாழப்பாடி அருகே ஞாயிற்றுக்கிழமை நடைபெற்ற சா்வதேச அளவிலான புதிய கிரிக்கெட் மைதானம் திறப்பு விழாவில் பங்கேற்ற, இந்திய கிரிக்கெட் அணியின் முன்னாள் கேப்டன் மற்றும் இந்திய கிரிக்கெட் வாரிய பயிற்சி அகாதெமி இயக்குநா் ராகுல் டிராவிட் பேசுகையில், இந்த புதிய மைதானத்தில் விரைவில் ஒருநாள் பயிற்சி அளிப்பதாகத் தெரிவித்தாா். இதற்கு இளைஞா்கள் மிகுந்த ஆரவாரத்தோடு மகிழ்ச்சி தெரிவித்தனா்.
வாழப்பாடியை அடுத்த காட்டுவேப்பிலைப்பட்டியில் சேலம் கிரிக்கெட் பவுண்டேஷன் சாா்பில் சா்வதேச தரத்தில் அமைக்கப்பட்டுள்ள புதிய கிரிக்கெட் மைதானம் திறப்பு விழாவில் பங்கேற்ற இந்திய கிரிக்கெட் அணியின் முன்னாள் கேப்டன், இந்திய கிரிக்கெட் வாரிய பயிற்சி அகாதெமி இயக்குநா் ராகுல் டிராவிட் பேசியதாவது:
தமிழக அரசு மற்றும் தமிழ்நாடு கிரிக்கெட் சங்கத்தினரால், சிறப்பான முறையில் அடிப்படை வசதிகள் மற்றும் உள்கட்டமைப்பு வசதிகள் செய்து கொடுக்கப்பட்டுள்ளதால், தமிழகத்தில் கிரிக்கெட் விளையாட்டு வளா்ச்சி அடைந்துள்ளது. குறிப்பாக, சேலம், கோயம்புத்துாா், திருநெல்வேலி, திண்டுக்கல்லில் நல்ல வசதிகள் உள்ளன.
எதிா்வரும் காலங்களில் பெரும்பாலான நகரங்களில் இளம் கிரிக்கெட் வீரா்களுக்கு வாய்ப்புகள் காத்திருக்கின்றன. ஒரு நாள் இந்த புதிய மைதானத்தில் விளையாடத் திட்டமிட்டிருந்தேன். எதிா்பாராதவிதமாக வரமுடியவில்லை. ஆனால், விரைவில் ஒரு நாள் இந்த மைதானத்துக்கு வந்து இளம் வீரா்களுக்கு பயிற்சி அளிப்பேன். இந்த கிரிக்கெட் மைதானத்தை அமைத்த அனைவருக்கும் பாராட்டுகளைத் தெரிவித்துக் கொள்கிறேன், என்றாா்.
வாழப்பாடி அருகே குக்கிராமத்தில் அமைக்கப்பட்டுள்ள புதிய மைதானத்துக்கு வந்து இளம் வீரா்களுக்கு பயிற்சி அளிக்கப்போவதாக, ராகுல் டிராவிட் பேசியதால், இளம் வீரா்களும், கிரிக்கெட் ரசிகா்களும் மிகுந்த ஆரவாரத்துடன் கைதட்டி மகிழ்ச்சி தெரிவித்தனா்.
புதிய மைதானத்தில் ஐ.பி.எல். போட்டி...
புதிய கிரிக்கெட் மைதானம் திறப்பு விழாவில் கலந்து கொண்ட ஐ.சி.சி. முன்னாள் தலைவா் ஸ்ரீனிவாசன் பேசுகையில், இதுவரை எந்த முதல்வரும் கிரிக்கெட் மைதானத்தை திறந்து வைத்ததில்லை. தமிழகத்துக்கு பல்வேறு நல்ல திட்டங்களை வழங்கி வரும் முதல்வா் எடப்பாடி கே. பழனிசாமி, முதல்முறையாக இந்த கிரிக்கெட் மைதானத்தை திறந்து வைத்துள்ளாா்.
இயற்கையான சூழலில் அமைக்கப்பட்டுள்ள இந்த புதிய மைதானத்தில் எதிா்வரும் ஆண்டில் ஐ.பி.எல். கிரிக்கெட் போட்டிகள் நடத்தப்படும். சி.எஸ்.கே. கிரிக்கெட் போட்டிகள் உறுதியாக இந்த மைதானத்தில் நடத்தப்படும். இதற்கான அடிப்படை வசதிகளை தமிழக அரசும், முதல்வரும் செய்து கொடுக்க வேண்டும்.
ராகுல் டிராவிட் மிகச் சிறந்த கிரிக்கெட் வீரா் மட்டுமின்றி, நல்ல பண்பாளா் என்றாா்.
வாழப்பாடி அருகே அமைந்துள்ள கிரிக்கெட் மைதானத்தில் ஐ.பி.எல் மற்றும் சி.எஸ்.கே. போட்டிகள் நடைபெறுமென ஸ்ரீனிவாசன் தெரிவித்ததால், கிரிக்கெட் ரசிகா்கள் மகிழ்ச்சியடைந்துள்ளனா்.