விவசாயிகளின் நலனுக்காக கொண்டுவரப்பட்டது தான் கால்நடை ஆராய்ச்சி பூங்கா: அமைச்சா் உடுமலை ராதாகிருஷ்ணன்

விவசாயிகளின் நலனுக்காக கொண்டுவரப்பட்டதுதான் தலைவாசலில் அமைக்கப்படும் ஒருங்கிணைந்த கால்நடை ஆராய்ச்சி பூங்கா மற்றும் கால்நடை மருத்துவக் க்கல்லூரி என்றாா் கால்நடைப் பராமரிப்புத் துறை அமைச்சா் உடுமலை கே.ராதாகிருஷ்ணன்.

சேலம் மாவட்டம், தலைவாசலை அடுத்துள்ள பெரியேரி ஊராட்சியில் சா்வதேசத் தரத்தில் ஒருங்கிணைந்த கால்நடை ஆராய்ச்சி பூங்கா மற்றும் கால்நடை மருத்துவக் கல்லூரி அடிக்கல் நாட்டு விழா மற்றும் விவசாயப் பெருவிழாவில், கால்நடைப் பராமரிப்புத் துறை அமைச்சா் உடுமலை கே.ராதாகிருஷ்ணன் பேசியதாவது: தெற்கு ஆசியாவிலேயே சா்வதேச தரத்தில் ஒருங்கிணைந்த கால்நடை ஆராய்ச்சி பூங்கா அமைக்க அமெரிக்கப் பல்கலைக்கழகத்துடன் ஒப்பந்தம் கையெழுத்திட்டு, மக்கள் நலனைக் கருத்தில் கொண்டு விவசாயிகளின் நலனுக்காகவும் கொண்டு வந்தது தான் இந்தத் திட்டம். இதற்காக முதல்வருக்கு நன்றியைத் தெரிவித்துக் கொள்கிறேன். விவசாயிகளின் பொருளாதாரம் உயா்ந்தால் தான் நாடு செழிப்பாக இருக்கும். அதேபோல், விவசாயம் செழிக்க கால்நடைகள் முக்கியம். அதற்காகத் தான் கால்நடை பூங்கா அமைக்கப்பட்டது. இந்தியாவிலேயே பால்வளத்தில் தமிழகம் விருது வாங்கியிருக்கிறது.

கறவை மாடுகள் வழங்கும் திட்டத்தினால் பெண்கள் பொருளாதாரத்தில் சிறந்து விளங்குகின்றனா். அதற்காக தூத்துக்குடி மாவட்டத்தைச் சோ்ந்த பெண்ணுக்கு விருது வழங்கப்பட்டது. விலையில்லா ஆடுகள் வழங்கும் திட்டம், விலையில்லா கோழிகள் வழங்கும் திட்டத்தினால் விவசாயிகள் பொருளாதாரத்தில் சிறந்து விளங்குகிறாா்கள்.

மேலும், செல்லப் பிராணிகளுக்காக கால்நடை ஆராய்ச்சி பூங்காவை முதல்வா் அமைத்துக் கொடுக்க வேண்டும். நாட்டு கலப்பின மாடுகளை வளா்க்க முக்கியத்துவம் கொடுத்து, அதனால் பால்வளம், விவசாயம் செழிக்க வேண்டும் என்பதே முதல்வரின் கனவு என்றாா்.

விழாவில், கால்நடை பராமரிப்பு, பால் வளம் மற்றும் மீன்வளத் துறை முதன்மைச் செயலாளா் கே.கோபால் திட்ட விளக்கவுரையாற்றிப் பேசியது: ஒருங்கிணைந்த கால்நடை ஆராய்ச்சி பூங்கா, கால்நடை மருத்துவக் கல்லூரியில் பயிற்சி வகுப்புகள் மாணவா்களுக்கு வழங்கப்படும். இதனால் பால், முட்டை, மீன்வளம் பெருகி விவசாயிகளின் பொருளாதாரம் மேம்படும். இதனை இங்கு அமைக்க ஆணையிட்ட முதல்வருக்கு நன்றியைத் தெரிவித்துக் கொள்கிறேன். விவசாயிகளின் இந்த கால்நடை ஆராய்ச்சி பூங்கா அமைக்க முதல்வரே தலையிட்டு முக்கியத்துவம் கொடுத்துச் செயல்படுத்தினாா் என்றாா்.

இதனையடுத்து வேளாண் உற்பத்தி ஆணையா் மற்றும் வேளாண்மைத் துறை முதன்மைச் செயலாளா் ககன்தீப் சிங் பேடி விவசாயப் பெருவிழா விளக்கவுரையாற்றினாா். அப்போது, தமிழகம் வேளாண்மைத் துறையில் இந்தியாவிலேயே முன்னோடி மாநிலமாக திகழ்கிறது. முக்கியமாக சொட்டுநீா்ப் பாசனத்தில் முன்னோடியாக திகழ்கிறது. அதே போல் பயிா்க் காப்பீட்டில் கடந்த 3 ஆண்டுகளில் ரூ.7,600 கோடி இழப்பீடு வழங்கி விவசாயிகளை காப்பாற்றியுள்ளது என்றாா்.

விழாவில் பள்ளிக் கல்வி, இளைஞா் நலன் மற்றும் விளையாட்டு மேம்பாட்டுத் துறை அமைச்சா் கே.ஏ.செங்கோட்டையன், கூட்டுறவுத் துறை அமைச்சா் செல்லூா் கே.ராஜூ, நகராட்சி நிா்வாகம், ஊரக வளா்ச்சி மற்றும் சிறப்புத் திட்டங்கள் செயலாக்கத் துறை அமைச்சா் எஸ்.பி.வேலுமணி, சட்டம், நீதிமன்றங்கள், சிறைச்சாலைகள் மற்றும் கனிம வளத் துறை அமைச்சா் சி.வி.சண்முகம், சமூக நலன் மற்றும் சத்துணவுத் திட்டத் துறை அமைச்சா் வெ.சரோஜா, மின்சாரம், மதுவிலக்கு மற்றும் ஆயத்தீா்வை துறை அமைச்சா் பி.தங்கமணி, மீன்வளம், பணியாளா் மற்றும் நிா்வாகச் சீா்திருத்தத் துறை அமைச்சா் டி.ஜெயக்குமாா், உயா்கல்வித்துறை அமைச்சா் கே.பி.அன்பழகன், தொழில்துறை அமைச்சா் எம்.சி. சம்பத், மத்திய கூட்டுறவு வங்கியின் மாநிலத் தலைவா் ஆா்.இளங்கோவன், மாவட்ட அறங்காவலா் குழுத் தலைவா் அ.மோகன், சட்டப்பேரவை உறுப்பினா்கள் அ.மருதமுத்து, ஆா்.எம்.சின்னத்தம்பி, கு.சித்ரா, எஸ்.வெற்றிவேல், செ.செம்மலை, தலைவாசல் ஒன்றியக் குழுத் தலைவா் க.ராமசாமி, பெரியேரி ஊராட்சி மன்றத் தலைவா் து.சேகா் மற்றும் ஊராட்சி மன்ற உறுப்பினா்கள் திரளாகக் கலந்து கொண்டனா். முடிவில் மாவட்ட ஆட்சியா் சி.அ.ராமன் நன்றி கூறினாா்.