நண்பா்களை துப்பாக்கியால் சுட்டதாக, தொழிலாளியை போலீஸாா் கைது செய்தனா்.
சேலம் மாவட்டத்துக்குள்பட்ட ஆட்டையாம்பட்டி அருகேயுள்ள பெரியசீரகாபாடி சோ்ந்த முருகன் (40),, அதே பகுதியைச் சோ்ந்த வெங்கடாசலம் (40), அரூரைச் சோ்ந்த கணேசன் மகன் ரமேஷ் (30) ஆகிய மூவரும் விசைத்தறித் தொழில் செய்து வருகின்றனா்.
இந்த நிலையில் புதன்கிழமை மாலை ரமேஷ் குடிபோதையில் இருந்தாராம். அப்போது மற்ற இருவரிடம், தன்னிடம் ‘ஏா்கன் துப்பாக்கி’ இருக்கிறது என கூறி, இருவரையும் சுட்டாராம்.
இதில் இருந்து பாய்ந்த ஈய குண்டு முருகனின் தோள்பட்டையிலும் , வெங்கடாசலத்தின் காலிலும் பாய்ந்தன. காயம் அடைந்த இருவரும் சேலத்தில் உள்ள தனியாா் மருத்துவமனையில் சிகிச்சைக்காகச் சோ்க்கப்பட்டனா்.
புகாரின் பேரில் ஆட்டையாம்பட்டி காவல் நிலைய உதவி ஆய்வாளா் தேவிமரியசெல்வம் வழக்குப் பதிந்து விசாரணை நடத்தி, ரமேஷை கைது செய்தாா். மேலும், அவரிடம் இருந்த ஏா்கன் துப்பாக்கி பறிமுதல் செய்யப்பட்டது.
விசாரணையில் கிடைத்த தகவல் குறித்து போலீஸாா் தெரிவித்தது:-
அரூரை சோ்ந்த ரமேஷ் திருமணமாகி, தனது மனைவியை விவாகரத்து செய்துவிட்டாா். இந்த நிலையில் பெரிய சீரகாபாடியில் அவரது தாத்தா சுந்தரம் வீட்டில் கடந்த 20 ஆண்டுகளுக்கு மேலாக வசித்து வருகிறாா்.
குடிப்பழக்கம் கொண்ட இவா் அதே பகுதியை சோ்ந்த இன்னொரு ரமேஷிடம் குருவி சுடுவதற்கு என கூறி ஏா்கன் துப்பாக்கி வாங்கி வந்துள்ளாா். ஆனால் அவா் நண்பா்களை விரட்ட பயன்படுத்திய போது அதிலிருந்து குண்டு வெளியாகியுள்ளது.
இந்த ரக துப்பாக்கிக்கு லைசென்ஸ் தேவையில்லை என்றனா்.