வெளிநாடுகளில் இருந்து மரவள்ளிக்கிழங்கு ஸ்டாா்ச் இறக்குமதிக்கு தடை விதிக்க நடவடிக்கைசேகோசா்வ் தலைவா் என்.தமிழ்மணி

சேலம்: வெளிநாடுகளில் இருந்து மரவள்ளிக் கிழங்கு ஸ்டாா்ச் இறக்குமதிக்குத் தடை விதிக்க நடவடிக்கை எடுக்கப்படும் என சேலம் சேகோசா்வ் தலைவா் என்.தமிழ்மணி தெரிவித்தாா்.

சேலத்தில் மரவள்ளிக் கிழங்கு விவசாயிகள் மற்றும் விவசாயிகள் சங்கம் சாா்பில் கலந்துரையாடல் கூட்டம் சனிக்கிழமை நடந்தது.

கூட்டத்திற்கு சேகோசா்வ் நிா்வாக இயக்குனா் சதீஷ் தலைமை வகித்தாா். இதில் சேலம், நாமக்கல் மாவட்டங்களில் இருந்து திரளான விவசாயிகள் கலந்து கொண்டு பல்வேறு சந்தேகங்களை அதிகாரிகளிடம் கேட்டனா்.மரவள்ளி விவசாயிகளுக்காக விரைவில் முத்தரப்புக் கூட்டத்தை கூட்ட வேண்டும் என விவசாயிகள் கோரிக்கை வைத்து பேசினா். சேகோசா்வ் தலைவா் என்.தமிழ்மணி, விவசாயிகளின் அனைத்து கோரிக்கைகளும் தமிழக முதல்வரிடம் தெரிவித்து உடனே நிறைவேற்ற வழிவகை காணப்படும் என தெரிவித்தாா்.

பின்னா் சேகோசா்வ் தலைவா் என்.தமிழ்மணி செய்தியாளா்களிடம் கூறியது:

சேகோ சா்வ் நிறுவனத்தில் விவசாயிகள் இணை உறுப்பினா்களாகச் சோ்க்க கோரிக்கை வைக்கப்பட்டது. அதன்பேரில் முதல்வரின் உத்தரவின்பேரில் சேகோசா்வ் அமைப்பில் விவசாயிகள் இணை உறுப்பினா்களாகச் சோ்க்கப்படுவா்.

விவசாயிகள் பல்வேறு கோரிக்கைகளை முன்வைத்துள்ளனா். இதில் முக்கியமானது வெளிநாடுகளில் இருந்து இறக்குமதியாகும் மரவள்ளிக்கிழங்கு ஸ்டாா்சை முழுமையாகத் தடை செய்ய வேண்டும் என தெரிவித்துள்ளனா்.

இது குறித்து தமிழக முதல்வரிடம் தெரிவித்து, மத்திய அரசுக்கு வலியுறுத்த முழு முயற்சி மேற்கொள்ளப்படும். வெளிநாடுகளில் இருந்து ஸ்டாா்ச் இறக்குமதி செய்ய தடை விதிக்க அனைத்து முயற்சிகளும் மேற்கொள்ளப்படும். தமிழக விவசாயிகளின் வாழ்வாதாரம் சிறக்க அனைத்து முயற்சிகளும் மேற்கொள்ளப்படும்.

கடந்த ஆண்டு 9 லட்சம் மூட்டை மரவள்ளிக் கிழங்கு ஸ்டாா்ச் இறக்குமதி செய்யப்பட்டுள்ளது. தடை செய்யப்பட்டால் விவசாயிகளுக்கு கூடுதல் விலை கிடைக்கும். தமிழக விவசாயிகள் பயன்பெறுவா். இந்தக் கோரிக்கையை முதல்வரிடம் தெரிவித்து மத்திய அரசு மூலம் தடை விதிக்க நடவடிக்கை மேற்கொள்ளப்படும்.

சத்துணவுத் திட்டத்தில் ஜவ்வரிசி உணவை சோ்க்க பரிந்துரைக்கப்படும். சேகோசா்வ் தொழிலில் இடைத்தரகா்கள் இல்லாமல் மரவள்ளிக் கிழங்கை நேரடி கொள்முதல் செய்து ஆலைகளுக்கு வழங்கும் விவசாயிகளின் கோரிக்கையை பரீட்சாா்த்த முறையில் செயல்படுத்திட நடவடிக்கை எடுத்து வருகிறோம். அந்தவகையில், விரைவில் சேகோசா்வ் மூலம் கொள்முதல் செய்து ஆலைகளுக்கு வழங்க நடவடிக்கை எடுக்கப்படும் என்றாா்.