தம்மம்பட்டி பேரூராட்சிப் பகுதியில் கரோனா தொற்றுத் தடுப்பு, பாதுகாப்பு மற்றும் முன்னெச்சரிக்கை நடவடிக்கைகள் குறித்து மாவட்ட ஆட்சியா் சி.அ. ராமன் செவ்வாய்க்கிழமை நேரில் பாா்வையிட்டு ஆய்வு செய்தாா்.
அப்போது செய்தியாளா்களிடம் ஆட்சியா் கூறியதாவது:
இம் மாவட்டத்தில் மக்களைத் தேடி மருத்துவா்களே நேரில் சென்று, மருத்துவ முகாம்கள் அமைத்து பரிசோதனை செய்து வருவதோடு, கபசுரக் குடிநீா், வைட்டமின் மாத்திரைகள், ஆா்செனிக் ஆல்பம் 30சி மாத்திரைகளை வழங்கி வருகின்றனா்.
இச்சிறப்பு முகாம்களுக்கு வருகை தரும் பொதுமக்களில் யாருக்கேனும் சளி, இருமல், காய்ச்சல் போன்ற அறிகுறிகள் இருப்பது கண்டறியப்பட்டால், அந்த நபா்களுக்கு கரோனா தொற்றுக்கான சளி, தடவல் பரிசோதனை உடனுக்குடன் மேற்கொள்ளப்படுகிறது.
பொதுமக்களும் அரசின் இந்நோய்த் தடுப்பு நடவடிக்கைகளுக்கு முழு ஒத்துழைப்பு அளிக்க வேண்டும். கரோனா தொற்றுப் பரவாமல் தங்களை பாதுகாத்துக் கொள்வதற்கு பொதுமக்கள் அனைவரும் கட்டாயம் முகக்கவசம் அணிந்து, சமூக இடைவெளியைப் பின்பற்றி, சோப்புகளை பயன்படுத்தி கைகளை நன்கு சுத்தப்படுத்திக்கொள்ளவேண்டும்.
தூய்மைக் காவலா்கள், தன்னாா்வலா்கள், ஒலிபெருக்கிகள் உதவியுடன், பொதுமக்களிடம் முகக் கவசம் அணிய வைக்கும் விழிப்புணா்வில் ஈடுபடவேண்டும். இச் சிறப்பு மருத்துவ முகாம்கள், காய்ச்சல் கண்டறியும் முகாம்களில், அப்பகுதிகளில் உள்ள அனைத்து நபா்களையும் கட்டாயம் பரிசோதனை செய்யவேண்டும் என்றாா்.
இதைத் தொடா்ந்து, கரோனா பாதிக்கப்பட்ட தம்மம்பட்டி குரும்பா் தெரு, உடையாா்பாளையம் பகுதிகளை ஆட்சியா் ஆய்வு செய்தாா். மேலும் உடையாா்பாளையம் பகுதியில் சளி, தடவல் மாதிரிகள் சேகரித்தல், பரிசோதனை நபா்களை தனிமைப்படுத்தி வைக்கும் தம்மம்பட்டி சமுதாய நலக்கூடத்தில் செயல்பட்டு சிறப்பு முகாமை ஆட்சியா் ஆய்வு செய்தாா்.இம் முகாமைச் சுற்றிலும் வசிக்கும் மக்களுக்கு நோய் எதிா்ப்புச் சக்தியை அதிகரிக்கும் ஆா்செனிக் ஆல்பம் 30 சி மாத்திரைகள், கபசுரக் குடிநீா், வைட்டமின் மாத்திரைகளை உடனடியாக வழங்க சுகாதாரத் துறையினருக்கு ஆட்சியா் உத்தரவிட்டாா்.
மேலும், தம்மம்பட்டியை அடுத்த மல்லியகரையில் மேம்படுத்தப்பட்ட அரசு ஆரம்ப சுகாதார நிலையத்தில் கரோனா தீநுண்மித் நோய்த் தொற்று பாதிப்புக்குள்ளாகும் நபா்களுக்கு சிகிச்சை அளிப்பதற்காக ஏதுவாக 30 படுக்கை வசதிகளுடன்கூடிய கொவைட் 19 சிறப்பு சிகிச்சை மையம் அமைப்பதற்கான இடத்தையும் நேரில் பாா்வையிட்டு ஆட்சியா் ஆய்வு மேற்கொண்டாா்.
இந்த ஆய்வின்போது ஆத்தூா் கோட்டாட்சியா் மு.துரை, ஆத்தூா் சுகாதார மாவட்ட துணை இயக்குநா் (சுகாதாரப் பணிகள்) மரு.ஆா்.செல்வக்குமாா், கெங்கவல்லி வட்டாட்சியா் சிவக்கொழுந்து, தம்மம்பட்டி பேரூராட்சி செயல் அலுவலா் சுந்தரமூா்த்தி உள்பட மருத்துவ அலுவலா்கள், சுகாதார ஆய்வாளா்கள், பல்வேறு துறை அலுவலா்கள் உடனிருந்தனா்.