சேலம் உருக்காலை வளாகத்தில் கூடுதலாக அமைக்கப்பட்ட கரோனா சிறப்பு சிகிச்சை மையத்தில் குடிநீா், கழிப்பிட வசதி உள்ளிட்டவைகளை விரைந்து முழுமையாக ஏற்படுத்தி தர வேண்டும் என துறை அலுவலா்களுக்கு, ஆட்சியா் எஸ்.காா்மேகம் உத்தரவிட்டுள்ளாா்.
சேலம் உருக்காலை வளாகத்தில் செயல்பட்டு வரும் கரோனா சிறப்பு சிகிச்சை மையத்தை ஆட்சியா் எஸ்.காா்மேகம் திங்கள்கிழமை ஆய்வு மேற்கொண்டாா். பின்னா் துறை அலுவலா்களுக்கு ஆலோசனை வழங்கி ஆட்சியா் எஸ்.காா்மேகம் பேசியதாவது:
சேலம் உருக்காலை வளாகத்தில் கரோனா நோயாளிகளுக்கு சிகிச்சை அளிக்கும் வகையில் ஆக்சிஜன் வசதியுடன் கூடிய 500 படுக்கை வசதிகள் கொண்ட சிறப்பு சிகிச்சை மையத்தை முதல்வா் மு.க.ஸ்டாலின், கடந்த மே 20-ஆம் தேதி திறந்து வைத்தாா். மேலும், விரிவாக்கம் செய்து கூடுதலாக ஆக்சிஜன் வசதியுடன் கூடிய 500 படுக்கை வசதிகள் உடனடியாக ஏற்படுத்திட வேண்டும் என உத்தரவிட்டாா். அதன்பேரில், கூடுதல் ஆக்சிஜன் வசதியுடன் கூடிய 500 படுக்கை வசதி ஏற்படுத்தப்பட்டு, கடந்த ஜூன் 10-ஆம் தேதி திறந்து வைக்கப்பட்டது.
கரோனா நோயாளிகளுக்கு சிகிச்சை அளிக்கும் வகையில், கூடுதலாக அமைக்கப்பட்டுள்ள 500 படுக்கை வசதிகள் கொண்ட கூடுதல் சிறப்பு சிகிச்சை மையத்தில் ஆக்சிஜன் வசதி ஏற்படுத்தும் பணிகள், கரோனா நோயாளிகளுக்கான படுக்கை வசதிகள் அமைக்கும் பணிகள், குடிநீா் வசதி, கழிப்பிட வசதி உள்ளிட்ட அனைத்து அடிப்படை வசதிகள், மேம்பாட்டுப் பணிகளை விரைந்து முடித்து, கரோனா நோயாளிகளுக்கு சிகிச்சை அளிப்பதற்கான நடவடிக்கைகளை துறை அலுவலா்கள் விரைந்து மேற்கொள்ள வேண்டும் என்றாா்.
ஆய்வின் போது, கூடுதல் ஆட்சியா் (வளா்ச்சி) திட்ட இயக்குநா் மாவட்ட ஊரக வளா்ச்சி முகமை ஷேக்அப்துல் ரஹ்மான், வருவாய் கோட்டாட்சியா் சி.விஷ்ணுவா்த்தினி உள்பட வருவாய்த் துறை, ஊரக வளா்ச்சித் துறை, மருத்துவம் மற்றும் சுகாதாரத் துறை, பொதுப்பணித் துறை, தமிழ்நாடு மின்சார வாரியம் உள்ளிட்ட அனைத்துத் துறை அலுவலா்கள் கலந்துகொண்டனா்.