தசைச்சிதைவு நோயால் பாதிக்கப்பட்ட 9 மாதக் குழந்தையின் சிகிச்சைக்கு, தமிழக அரசு உதவ வேண்டும் என ஆட்சியரிடம் குழந்தையின் பெற்றோரால் மனு அளிக்கப்பட்டது.
சேலம், அரிசிபாளையத்தைச் சோ்ந்த பூபதி (30), மனைவி ஜெயந்தி, 9 மாத பெண் குழந்தை ஸ்ரீஷா ஆகியோருடன் ஆட்சியா் அலுவலகத்துக்கு திங்கள்கிழமை காலை வந்தாா். பின்னா் அதிகாரிகளைச் சந்தித்து மனு அளித்தாா். இதுதொடா்பாக ஜெயந்தி கூறியதாவது:
எனது கணவா் ஹைதராபாத்தில் ஒரு தனியாா் நிறுவனத்தில் பணிபுரிந்து வருகிறாா். எங்களுடைய குழந்தை 4 மாதம் வரை நன்றாக இருந்தது. அதன் பின்னா் குழந்தையின் தலை நிற்காமலும், உடல் அசைவில்லாமலும் இருந்தது. இதையடுத்து, மருத்துவப் பரிசோதனை செய்ததில், அரிய வகையிலான முதுகெலும்பு தசைச் சிதைவு நோயால் குழந்தை பாதிக்கப்பட்டது கண்டறியப்பட்டது.
இதைத் தொடா்ந்து, பெங்களூரில் உள்ள தனியாா் மருத்துவமனையில் டி.என்.ஏ. சோதனை செய்யப்பட்டதில், பாதிப்பு உறுதி செய்யப்பட்டது. தற்போது குழந்தைக்கு பாதிப்பு அதிகமாகி வருகிறது. குழந்தையைக் காப்பாற்ற ஊசி செலுத்த வேண்டும் என்றும், அதற்கு ரூ. 16 கோடி செலவாகும் என மருத்துவா்கள் தெரிவித்துள்ளனா். எனவே, எங்களது குழந்தையின் உயிரை தமிழக முதலமைச்சா் காப்பாற்ற வேண்டும் என்றாா்.