அரசு மோகன் குமாரமங்கலம் மருத்துவக் கல்லூரியில் புதிதாக வெண்புள்ளி நோய் (புற ஊதா கதிா்) சிகிச்சைக்கான அதிநவீன கருவி நிறுவப்பட்டுள்ளது.
சேலம் அரசு மோகன் குமாரமங்கலம் மருத்துவக் கல்லூரி மருத்துவமனை வளாகத்தில், உலக வெண்புள்ளி நோய் தின விழிப்புணா்வு நிகழ்ச்சி நடைபெற்றது. இதில், இரண்டாம் ஆண்டு செவிலிய பட்டயப் படிப்பு பயிற்சி மாணவியா் கலந்துகொண்டு, வெண்புள்ளி சம்பந்தப்பட்ட பொது அறிவுத் தோ்வு எழுதினா்.
இதில், முதல் மூன்று இடங்களை வென்ற மாணவியருக்கு பரிசளிப்பு மற்றும் வெண்புள்ளி தொடா்பாக அறிவியல் பூா்வமான கருத்துரைகள் வழங்கும் நிகழ்ச்சி திங்கள்கிழமை நடைபெற்றது.
இந்நிகழ்ச்சியில் அரசு மோகன் குமாரமங்கலம் மருத்துவக் கல்லூரியின் முதன்மையா் வள்ளி சத்தியமூா்த்தி கலந்துகொண்டு பரிசுகளை வழங்கினாா். துணை மருத்துவக் கண்காணிப்பாளா் பொன்.ராஜராஜன், மருத்துவத் துறைத் தலைவா் மருத்துவா் சுரேஷ் கண்ணன், சா்க்கரை நோய் துறைத் தலைவா் கோ.பிரகாஷ் கலந்துகொண்டு பேசினா்.
தோல் நோய் துறைத் தலைவா் கோ.பாலாஜி பேசியதாவது:
வெண்புள்ளி அல்லது வெண்புள்ளி நோய் அல்லது விட்டிலிகோ என்பது சருமத்தில் ஏற்படக்கூடிய நிறமாற்றமாகும். தோலுக்கு நிறத்தைக் கொடுக்கும் மெலனின் என்ற நிறமி குறைவதுதான் வெண்புள்ளி ஏற்படுவதன் அடிப்படை.
குழந்தை முதல் பெரியவா் வரை யாருக்கு வேண்டுமானாலும் வரக்கூடிய சாதாரண பாதிப்புதான் இது. மக்கள் இதுபற்றி அச்சப்படாமல் இருப்பதே முக்கியம்.
வெண்புள்ளியை ஒரு தொற்று வியாதியாகவே நம்மில் பலரும் தவறாக புரிந்து வைத்திருக்கிறோம். இது நிச்சயம் தொற்றுநோய் இல்லை. தொடக்க நிலையில் மருத்துவரை ஆலோசித்தால் இதற்கு நிச்சயம் நல்ல தீா்வு காணலாம்.
அரசு மோகன் குமாரமங்கலம் மருத்துவக் கல்லூரி மருத்துவமனையில் வெண்புள்ளி நோய் (புற ஊதா கதிா்) சிகிச்சைக்கான அதிநவீன கருவி புதிதாக நிறுவப்பட்டு பல நோயாளிகள் பயனடைந்து வருகின்றனா் என்றாா்.
தோல் நோய் துறை பேராசிரியா் மருத்துவா் ம.கருணாகரன் பேசுகையில், வெண்புள்ளி நோய்க்கு சிகிச்சை பெற உரிய மருத்துவரை அணுகுபோது குணமாக வாய்ப்புள்ளது. தோலில் அதிக அளவு வெண் புள்ளியால் பாதிக்கப்பட்டுள்ள நபா்கள் வெயிலில் செல்லும்போது கண்டிப்பாக குடைபிடித்துச் செல்ல வேண்டும் என்றாா்.