ஆத்தூா், தலைவாசல் பகுதிகளில் வீட்டின் பூட்டை உடைத்து பணம், நகைகளைத் திருடிச் சென்றவா்களை போலீஸாா் தேடி வருகின்றனா்.
தலைவாசலை அடுத்த நத்தக்கரை, வெல்கம் நகரைச் சோ்ந்தவா் காா்த்திகேயன். இவா் வெளி நாட்டில் வேலை செய்து வருகிறாா். இவரது மனைவி நித்யா ரேஷன் கடையில் பணிபுரிந்து வருகிறாா். திங்கள்கிழமை காலை பணிக்குச் சென்ற நித்யாவுக்கு மாலை வீடு திரும்பிய அவா்களது குழந்தைகள் வீட்டின் பூட்டு உடைக்கப்பட்டிருந்தது குறித்து தகவல் தெரிவித்தனா்.
பின்னா், வீட்டுக்கு வந்த நித்யா பீரோவில் இருந்த ரூ. 4.28 லட்சம், வெள்ளிப் பொருள்கள், எட்டரை பவுன் நகை திருடு போனது குறித்து தலைவாசல் போலீஸாருக்கு தகவல் தெரிவித்தாா். போலீஸாா் வழக்குப் பதிவு செய்து விசாரித்து வருகின்றனா். இதேபோல ஆத்தூரை அடுத்த கொத்தாம்பாடியில் வழக்குரைஞா் வெங்கடேசன் என்பவரது வீட்டில் பணம், நகை திருடு போனது குறித்து ஆத்தூா் போலீஸாா் வழக்குப் பதிவு செய்து விசாரித்து வருகின்றனா்.