சேலம், நாமக்கல் மாவட்டங்களில் அம்பேத்கா் பிறந்த நாள் விழா

அம்பேத்கா் பிறந்த நாளையொட்டி, சேலம், நாமக்கல் மாவட்டங்களில் உள்ள அம்பேத்கா் சிலைக்கு அதிமுக, பாஜக, தமிழ் மாநில காங்கிரஸ், விடுதலைச் சிறுத்தைகள் உள்ளிட்ட கட்சியினா் வியாழக்கிழமை மாலை அணிவித்து மரியாதை செலுத்தினா்.

மேலும், அரசு சாா்பில் தொங்கும் பூங்கா அருகில் அமைந்துள்ள அம்பேத்கா் சிலைக்கு மாவட்ட ஆட்சியா் எஸ்.காா்மேகம் வியாழக்கிழமை மாலை அணிவித்து மரியாதை செலுத்தினாா்.

சேலம் மக்களவை உறுப்பினா் எஸ்.ஆா்.பாா்த்திபன், சேலம் வடக்கு தொகுதி சட்டப் பேரவை உறுப்பினா் ஆா்.ராஜேந்திரன், மாவட்ட காவல் கண்காணிப்பாளா் எம்.ஸ்ரீஅபினவ், வருவாய் கோட்டாட்சியா் விஷ்ணுவா்த்தினி, சூரமங்கலம் மண்டலக் குழுத் தலைவா் எஸ்.டி.கலையமுதன் மற்றும் மாநகராட்சி வாா்டு உறுப்பினா்கள் உள்ளிட்ட பலா் இதில் கலந்து கொண்டனா்.

இதனையடுத்து அரசின் சாா்பில் அமைக்கப்பட்டிருந்த அம்பேத்கா் வாழ்க்கை வரலாறு குறித்த புகைப்படக் கண்காட்சி பொதுமக்கள் பாா்வைக்காக திறந்து வைக்கப்பட்டது.

சேலத்தில் உள்ள அம்பேத்கா் சிலைக்கு அதிமுக இணை ஒருங்கிணைப்பாளரும் , எதிா்க்கட்சித் தலைவருமான எடப்பாடி பழனிசாமி வியாழக்கிழமை மாலை அணிவித்து மரியாதை செலுத்தினாா். அதிமுக மாநகர மாவட்ட செயலாளா் வெங்கடாஜலம், சேலம் தெற்கு தொகுதி எம்.எல்.ஏ. பாலசுப்பிரமணியன், முன்னாள் எம்.பி. பன்னீா்செல்வம், முன்னாள் எம்.எல்.ஏ-க்கள் செல்வராஜ், ரவிச்சந்திரன், சக்திவேல் உள்ளிடோா் உடனிருந்தனா்.

பாஜக சாா்பில் மாநகர மாவட்ட பட்டியல் அணி மாவட்ட தலைவா் மகிழன் தலைமையில் மாலை அணிவித்து மரியாதை செலுத்தினா். பாஜக மாநகர மாவட்ட தலைவா் சுரேஷ்பாபு, மாவட்ட பாா்வையாளா்கள் கோபிநாத், அண்ணாதுரை, சேலம் மாநகர மாவட்ட வா்த்தகப் பிரிவு தலைவா் ஐ.சரவணன் உள்ளிட்ட கட்சியினா் பங்கேற்றனா்.

தமிழ் மாநில காங்கிரஸ் சாா்பில் மாவட்ட தலைவா் உலகநம்பி தலைமையில் கட்சியினா் மாலை அணிவித்து மரியாதை செலுத்தினா். விடுதலைச் சிறுத்தைகள் சாா்பில் நிா்வாகிகள் காஜாமொய்தீன், மாநகராட்சி உறுப்பினா் இமயவா்மன் உள்ளிட்ட நிா்வாகிகள் பங்கேற்றனா்.

காங்கிரஸ் கட்சி சாா்பில் மாநகர மாவட்ட தலைவா் பாஸ்கா் தலைமையில் கட்சியினா் மாலை அணிவித்து மரியாதை செலுத்தினா். அம்பேத்கா் பிறந்தநாளையொட்டி நீலப்படை பேரணி நடைபெற்றது. வள்ளுவா் சிலை அருகே தொடங்கி தொங்கும் பூங்கா அருகே பேரணி நிறைவுற்றது.

அம்பேத்கா் மக்கள் இயக்க மாநில தலைவா் அண்ணாதுரை தலைமையில், இந்திய குடியரசு கட்சி தலைவா் செ.கு.தமிழரசன், புரட்சி பாரதம் கட்சி தலைவா் ஜெகன்மூா்த்தி, திராவிட விடுதலை கழக தலைவா் கொளத்தூா் மணி, புரட்சி தமிழக நிறுவன தலைவா் மூா்த்தி ஆகியோா் பங்கேற்று அம்பேத்கா் சிலைக்கு மாலை அணிவித்து மரியாதை செலுத்தினா்.

மேட்டூா்: மேட்டூா், அச்சங்காட்டில் விடுதலைச் சிறுத்தைகள் கட்சி சாா்பில் நடைபெற்ற நிகழ்ச்சிக்கு மேட்டூா் நகா்மன்ற 29 வாா்டு கவுன்சிலா் மாரியம்மாள், விசிக மாவட்ட பொருளாளா் மேட்டூா் மெய்யழகன் ஆகியோா் அம்பேத்கா் சிலைக்கு மாலை அணிவித்தனா்.

மேட்டூா் நகர விசிக செயலாளா் அப்துல் கபூா், நகர பொருளாளா் சிவகுமாா், நகர தொழிலாளா் விடுதலை முன்னணி மாவட்ட துணை அமைப்பாளா் திருலோகசந்தா் உள்பட பலா் கலந்து கொண்டனா்.

நாமக்கல்

நாமக்கல் மணிக்கூண்டு அருகில் நகர பாஜக சாா்பில் நடைபெற்ற விழாவில், நகரத் தலைவா் கே.பி.சரவணன் தலைமை வகித்தாா். சிறப்பு அழைப்பாளராக மாவட்டத் தலைவா் சத்தியமூா்த்தி கலந்துகொண்டாா். தொடா்ந்து, அம்பேத்கரின் வாழ்க்கை வரலாற்றை கட்சியினா் விளக்கி பேசினா். பின்னா் அவரது படத்துக்கு மலா் தூவி மரியாதை செலுத்தப்பட்டது.

நாமக்கல் கிழக்கு மாவட்ட திமுக அலுவலகத்தில் நடைபெற்ற விழாவில், சட்டப் பேரவை உறுப்பினா் பெ.ராமலிங்கம் பங்கேற்றாா். நிகழ்ச்சியில், மாநில பொதுக்குழு உறுப்பினா் மாயவன், மாநில இலக்கிய அணி புரவலா் மணிமாறன், மாநில மகளிா் தொண்டரணி இணைச் செயலாளா் ராணி, மாவட்ட, நகர, ஒன்றிய நிா்வாகிகள் கலந்து கொண்டனா்.

இதேபோல, நாமக்கல் அண்ணா சிலை அருகில் விடுதலைச் சிறுத்தைகள் கட்சியினா் விழாவைக் கொண்டாடினா். தமிழ்நாடு அரசு எஸ்.சி., எஸ்.டி. அலுவலா் நலச்சங்கம் சாா்பில், சேந்தமங்கலத்தில் உள்ள ஆதரவற்றோா் இல்லத்துக்கு மதிய உணவு வழங்கப்பட்டது.

நாமக்கல் மாவட்ட ஆட்சியா் அலுவலகத்தில், அலங்கரித்து வைக்கப்பட்டிருந்த அம்பேத்கா் படத்துக்கு மாவட்ட வருவாய் அலுவலா் ந.கதிரேசன் மரியாதை செலுத்தினாா். இந்த நிகழ்ச்சியில் பல்வேறு துறை அலுவலா்களும் கலந்துகொண்டனா்.

ராசிபுரம்

பாஜக சாா்பில் நடைபெற்ற விழாவில் பாஜக துணைத் தலைவரும், முன்னாள் மாநிலங்களவை உறுப்பினருமான கே.பி.ராமலிங்கம் பங்கேற்று அம்பேத்கா் சிலைக்கு மாலை அணிவித்து மரியாதை செலுத்தினாா்.

விடுதலைச் சிறுத்தைகள் கட்சி சாா்பில் நகரச் செயலா் வீர.ஆதவன் தலைமையில் நடைபெற்ற விழாவில், பொதுமக்களுக்கு இலவச சேலை, அம்பேத்கா் வாழ்க்கை வரலாறு புத்தகம், இனிப்புகள் வழங்கப்பட்டன.

வெண்ணந்தூா் பேரூா் விடுதலைச் சிறுத்தைகள் கட்சி சாா்பில் பேரூா் செயலாளா் க.நடராஜன் தலைமையில் அம்பேத்கா் படத்துக்கு மலா்தூவி மரியாதை செலுத்தினா்.

நாமக்கல் வடக்கு மாவட்ட அமமுக சாா்பில், மாவட்டச் செயலாளா் ஏ.பி.பழனிவேல், நகரச் செயலாளா் எஸ்.வேலுசாமி ஆகியோரும், ராசிபுரம் நகர மாா்க்சிஸ்ட் கட்சியின் சாா்பில், கட்சியின் மாவட்டச் செயலா் எஸ்.கந்தசாமியும் அம்பேத்கா் சிலைக்கு மாலை அணிவித்து மரியாதை செலுத்தினா்.

வாழப்பாடி

வாழப்பாடி பேருந்து நிலையம் பகுதியில் உள்ள அம்பேத்கா் சிலைக்கு சேலம் மாவட்ட இந்திய குடியரசு கட்சி சாா்பில் அதன் மாநில தலைவா் பொன்னுத்தம்பி தலைமையில் மாவட்ட தலைவா் சந்தோஷ்குமாா், மாவட்ட செயலாளா் பழனிராஜ் உள்ளிட்டோா் மாலை அணிவித்து பொதுமக்களுக்கு இனிப்பு வழங்கினா்.

விடுதலைச் சிறுத்தைகள் கட்சி சாா்பில் வடக்கு ஒன்றியச் செயலாளா் வேல்முருகன் தலைமையில், நிா்வாகிகள் அறிவழகன், ராஜதுரை, கூ. வேல்மணி, சத்தியக்குமாா், சுரேஷ் உள்ளிட்டோா் மாலை அணிவித்து பொதுமக்களுக்கும், தொண்டா்களுக்கும் இனிப்பும், துக்கியாம்பாளையம் கமலாலயம் காப்பக குழந்தைகளுக்கு சமபந்தி விருந்தும் வழங்கினா்.

வாழப்பாடி தெற்கு ஒன்றிய விடுதலைச் சிறுத்தைகள் கட்சி சாா்பில் ஒன்றியச் செயலாளா் முல்லைவாணன் தலைமையில் நகரச் செயலாளா் ராமமூா்த்தி உள்ளிட்ட நிா்வாகிகள் அம்பேத்கா் சிலைக்கு மாலை அணிவித்து மரியாதை செய்தனா்.

ஆட்டையாம்பட்டி

சேலம் இரும்பாலை மோகன் நகரில் அமைந்துள்ள அம்பேத்கா் சிலைக்கு சேலம் மேற்கு தொகுதி எம்எல்ஏ அருள் (பாமக) தலைமையில் மாலை அணிவித்து மரியாதை செலுத்தப்பட்டது. இதில் பாட்டாளி தொழிற்சங்க முன்னாள் தலைவா் சதாசிவம், தொழிற்சங்க நிா்வாகிகள் வெங்கடாஜலம், சுப்பிரமணி, ரமேஷ், முருகன் உள்ளிட்ட பலா் கலந்து கொண்டு மலா்தூவி மரியாதை செலுத்தினா்.

பரமத்தி வேலூா்

பரமத்தி வேலூரில் நடைபெற்ற அம்பேத்காா் பிறந்த நாள் விழாவிற்கு பாஜக கபிலா்மலை வடக்கு ஒன்றியத் தலைவா் துரைசாமி தலைமை வகித்தாா்.செயலாளா் பூபதி வரவேற்றாா். கபிலா்மலை ஊராட்சி ஒன்றியக் குழு உறுப்பினா் பழனியப்பன் கட்சி கொடியை ஏற்றி வைத்து இனிப்புகள் வழங்கினாா்.

மாநில வழக்குரைஞா் பிரிவு செயலாளா் காந்தி நிகழ்ச்சியில் கலந்து கொண்டுஅம்பேத்கா் படத்துக்கு மாலை அணிவித்து மரியாதை செலுத்தினாா். மாக்சிஸ்ட் கம்யூனிஸ்ட் கட்சி சாா்பில் கபிலா்மலையில் நடைபெற்ற நிகழ்ச்சியில் மாவட்ட தீண்டாமை ஒழிப்பு முன்னணி செயலாளா் தங்கமணி கலந்து கொண்டு அம்பேத்கா் படத்துக்கு மலா்தூவி மரியாதை செலுத்தினாா்.

மாணவா் சங்க மாநில தலைவா் கண்ணன், மாவட்ட கட்டுமான சங்கச் செயலாளா் சிவராஜ் உள்ளிட்ட பலா் கலந்து கொண்டனா்.

கீழ் பரமத்தியில் நடைபெற்ற நிகழ்ச்சிக்கு விடுதலைச் சிறுத்தைகள் கட்சி பரமத்தி ஒன்றிய செயலாளா் கிள்ளிவளவன் தலைமை வகித்தாா். நகரச் செயலாளா் சுந்தரம் வரவேற்றாா்.மாவட்ட செயலாளா் காமராஜ் அம்பேத்கா் படத்துக்கு மாலை அணிவித்து மரியாதை செலுத்தி கட்சி கொடியை ஏற்றி வைத்து இனிப்புகளை வழங்கினாா்.