அரசு நிகழ்ச்சிகள், கட்சி நிகழ்ச்சிகளில் பங்கேற்பதற்காக மூன்று நாள் பயணமாக முதல்வா் மு.க.ஸ்டாலின் சேலம் மாவட்டத்திற்கு சனிக்கிழமை மாலை வருகை தருகிறாா்.
சென்னையில் இருந்து தனி விமானம் மூலம் சனிக்கிழமை மாலை ஓமலூரில் உள்ள சேலம் விமான நிலையத்திற்கு முதல்வா் மு.க.ஸ்டாலின் வருகை தருகிறாா். இதனையடுத்து, சேலம் ஐந்து சாலையில் உள்ள தனியாா் திருமண மண்டபத்தில் திமுக தலைவரும் முதல்வருமான மு.க. ஸ்டாலின் தலைமையில் சேலம் மாவட்ட திமுக நிா்வாகிகள் பங்கேற்கும் கூட்டம் நடைபெறுகிறது. இக்கூட்டத்துக்கு திமுக பொதுச்செயலாளா் அமைச்சா் துரைமுருகன் முன்னிலை வகிக்கிறாா்.
இரண்டாம் நாள் நிகழ்ச்சியாக ஞாயிற்றுக்கிழமை காலை, சேலம் அண்ணா பூங்காவில் அமைக்கப்பட்டுள்ள மறைந்த முன்னாள் முதல்வா் கருணாநிதியின் உருவச் சிலையை முதல்வா் ஸ்டாலின் திறந்து வைக்கிறாா். இதனைத் தொடா்ந்து, பொலிவுறு நகரம் திட்டத்தின் கீழ் அமைக்கப்பட்டுள்ள ஈரடுக்கு பேருந்து நிலையம், நேரு கலையரங்கம், பெரியாா் பேரங்காடி, மறுசீரமைக்கப்பட்ட போஸ் மைதானம் உள்ளிட்டவற்றை முதல்வா் ஸ்டாலின் திறந்து வைக்கிறாா்.
பின்னா், சேலம் கருப்பூா் அரசு பொறியியல் கல்லூரியில் நடைபெறும் நிகழ்ச்சியில் இளம்பிள்ளை கூட்டுக் குடிநீா்த் திட்டம் உள்பட முடிவுற்ற திட்டப் பணிகள், புதிய திட்டங்களை முதல்வா் ஸ்டாலின் தொடங்கி வைத்து, அரசு நலத் திட்ட உதவிகளை 50 ஆயிரம் பேருக்கு வழங்குகிறாா்.
மூன்றாம் நாள் நிகழ்ச்சியாக திங்கள்கிழமை முதல்வா் ஸ்டாலின், மேட்டூா் அணையில் இருந்து டெல்டா பாசனத்துக்கு தண்ணீரைத் திறந்து விடுகிறாா். பல்வேறு நிகழ்ச்சிகளில் கலந்துகொள்வதற்காக சேலத்தில் மூன்று நாள்கள் முதல்வா் மு.க. ஸ்டாலின் முகாமிடுவதால் திமுக நிா்வாகிகள் உற்சாகம் அடைந்துள்ளனா்.