‘நான் முதல்வன்’ திட்டத்தின் கீழ் பெரியாா் பல்கலை. மாணவா்கள் இங்கிலாந்து பயணம்

‘நான் முதல்வன்’ திட்டத்தின் கீழ் இங்கிலாந்து பயணம் மேற்கொள்ளவுள்ள மாணவா்களுக்கு பெரியாா் பல்கலைக்கழகத் துணைவேந்தா் இரா.ஜெகநாதன் வாழ்த்து தெரிவித்தாா்.

பெரியாா் பல்கலைக்கழக இணைவு பெற்ற கல்லூரிகளில் வேலைவாய்ப்பு சாா்ந்த பாடங்கள் நடத்தப்பட்டு வருகின்றன. இதன் ஒரு பகுதியாக ஸ்கெளட் எனும் திட்டத்தில் தமிழகம் முழுவதிலும் இருந்து சிறந்த 10 மாணவா்கள் தோ்ந்தெடுக்கப்பட்டு இங்கிலாந்து நாட்டில் உள்ள டா்ஹாம் பல்கலைக்கழகத்திற்கு பயிற்சிக்கு அனுப்பிவைக்கப்படவுள்ளனா்.

இந்தக் குழுவில் பெரியாா் பல்கலைக்கழகத்தில் இணைவு பெற்ற சேலம், அரசு இருபாலா் கலைக் கல்லூரி மாணவா் மிதுனராஜன், நாமக்கல் மாவட்டம், வெப்படை பான் சேக்கா்ஸ் கல்லூரி மாணவி ஹேமா ஆகியோா் தோ்வாகி உள்ளனா். மாணவி ஹேமா, ஏற்காடு வாழவந்தியைச் சோ்ந்த பழங்குடியின மாணவி என்பது குறிப்பிடத்தக்கது.

இவா்கள் வரும் ஜூன் 9-ம் தேதி முதல் 16-ம் தேதி வரை இங்கிலாந்து டா்ஹாம் பல்கலைக்கழகத்தில் தங்கி பயிற்சி பெற உள்ளனா். இதற்கான விமானக் கட்டணம், விசா நடைமுறை, தங்குமிடம் மற்றும் பயிற்சி சம்பந்தமான அனைத்துச் செலவுகளையும் தமிழக அரசு ஏற்றுக் கொள்கிறது.

இங்கிலாந்து செல்ல தோ்வாகியுள்ள மாணவா்களை பெரியாா் பல்கலைக்கழகத் துணைவேந்தா் நேரில் அழைத்து பாராட்டி வாழ்த்து தெரிவித்தாா். நிகழ்வில், நான் முதல்வன் திட்ட இயக்குநா் திருமூா்த்தி, மாவட்ட ஒருங்கிணைப்பாளா்கள் ரமேஷ், சேதுராஜ்குமாா், சம்பத், பாலமுருகன், பான் சேக்கா்ஸ் கல்லூரி முதல்வா் மாா்கரெட் டெய்சி, அரசு கலைக்கல்லூரி திட்ட ஒருங்கிணைப்பாளா் அகிலாண்டேஸ்வரி ஆகியோா் கலந்து கொண்டனா்.