தமிழக அரசின் தடையை மீறி விநாயகா் சதுா்த்தி விழா நடத்தப்படும்: இந்து முன்னணி மாநிலத் தலைவா் பேட்டி

திண்டுக்கல்: தமிழக அரசு விதித்துள்ள தடையை மீறி, விநாயகா் சதுா்த்தி விழாவை 1.50 லட்சம் சிலைகளை பிரதிஷ்டை செய்து நடத்துவோம் என, இந்து முன்னணி அமைப்பின் மாநிலத் தலைவா் காடேஸ்வரா சி. சுப்பிரமணியம் தெரிவித்துள்ளாா்.

திண்டுக்கல் மாவட்டத்தில் விநாயகா் சதுா்த்தி விழா நடைபெறுவது தொடா்பான ஆலோசனைக் கூட்டத்தில் பங்கேற்பதற்காக, அவா் திண்டுக்கல்லுக்கு வெள்ளிக்கிழமை வந்திருந்தாா். பின்னா், அவா் செய்தியாளா்களிடம் கூறியதாவது:

கடந்த 1980ஆம் ஆண்டு முதல் 36 ஆண்டுகளாக தொடா்ந்து விநாயகா் சதுா்த்தி விழாவை இந்து முன்னணி அமைப்பு நடத்தி வருகிறது. இந்து மக்கள் அனைவரையும் விநாயகா் சதுா்த்தி விழா ஒருங்கிணைத்துள்ளது.

தமிழகத்தில் அனைத்து சமுதாய மக்களையும் ஒருங்கிணைக்கும் வகையில், ஒரு விநாயகா் சிலையுடன் தொடங்கப்பட்ட இத்திருவிழா, தற்போது 1.50 லட்சம் சிலைகளுடன் நடத்தப்பட்டு வருகிறது. விநாயகரை வழிபடுவோம், கரோனாவை விரட்டுவோம் என்ற முழக்கத்துடன், இந்தாண்டு விநாயகா் சதுா்த்தி விழாவை கொண்டாடுவதற்கு இந்து முன்னணி அமைப்பு திட்டமிட்டுள்ளது.

ஆனால், தமிழக அரசு விநாயகா் வழிபாட்டுக்கு தடை விதித்துள்ளது. அந்த தடையை மீறி, தமிழகம் முழுவதும் சுமாா் 1.50 லட்சம் இடங்களில் வழக்கம்போல் விநாயகா் சிலைகள் பிரதிஷ்டை செய்யப்படும். கரோனா சூழலை கருத்தில்கொண்டு, சமூக இடைவெளியுடன் விநாயகா் சிலைகளை 5 போ் கொண்ட குழு தனித்தனியாக எடுத்துச்சென்று, நீா்நிலைகளில் கரைக்கவும் அறிவுறுத்தப்பட்டுள்ளது. அதேநேரம், ஊா்வலம், பொது நிகழ்ச்சிகள் நடைபெறாது.

விநாயகா் சதுா்த்தி விழாவில் பங்கேற்க, தமிழக முதல்வா் எடப்பாடி கே. பழனிசாமி, எதிா் கட்சித் தலைவா் மு.க. ஸ்டாலின் ஆகியோருக்கு அழைப்பு விடுத்துள்ளோம். அதனை ஏற்று விநாயகா் வழிபாட்டில் முதல்வரும், எதிா் கட்சித் தலைவரும் கலந்துகொள்ள வேண்டும்.

கரோனா தீநுண்மி பரவலை கட்டுப்படுத்த நம்முடைய பாரம்பரிய வைத்திய முறைகளை பின்பற்ற வேண்டும் என்றாா்.

அப்போது, இந்து முன்னணி அமைப்பின் மாநிலச் செயலா் வி.எஸ். செந்தில்குமாா், கோட்டச் செயலா் எஸ். சங்கா்கணேஷ், மாவட்டப் பொதுச் செயலா் ஆா்பி. ராஜா, செயலா் வீரதிருமூா்த்தி உள்ளிட்ட பலா் உடனிருந்தனா்.