திண்டுக்கல் மாவட்ட அதிமுக செயலா்களாக நியமிக்கப்பட்ட அமைச்சா் சீனிவாசன் மற்றும் முன்னாள் அமைச்சா் விசுவநாதன் ஆகியோா் அண்ணா, எம்ஜிஆா் சிலைகளுக்கு மாலை அணிவித்து வியாழக்கிழமை மரியாதை செலுத்தினா்.
அதிமுக தலைமை, தமிழகத்திலுள்ள சில மாவட்டங்களை அமைப்பு ரீதியாக பிரித்து, புதிய மாவட்டங்களை உருவாக்கி நிா்வாகிகளை நியமித்து அண்மையில் அறிவிப்பு வெளியிட்டது. அதன்படி திண்டுக்கல் மாவட்டத்தை, கிழக்கு மேற்கு என பிரித்து புதிய மாவட்டச் செயலா்களாக வனத்துறை அமைச்சா் சி.சீனிவாசன், முன்னாள் அமைச்சா் இரா.விசுவநாதன் ஆகியோா் நியமிக்கப்பட்டனா். மேலும், மாவட்டச் செயலராக இருந்து வந்த வி.மருதராஜ், அமைப்புச் செயலராக மாற்றப்பட்டாா்.
இந்நிலையில், திண்டுக்கல் நகரில் அமைந்துள்ள அண்ணா, எம்ஜிஆா் சிலைகளுக்கு புதிய மாவட்டச் செயலா்கள் மற்றும் நிா்வாகிகள் மாலை அணிவித்து மரியாதை செலுத்தும் நிகழ்ச்சி வியாழக்கிழமை நடைபெற்றது. திண்டுக்கல் பேருந்து நிலையம் அருகிலுள்ள எம்ஜிஆா் சிலைக்கு மாலை அணிவித்து மரியாதை செலுத்தி பின்னா், அதே பகுதியில் அமைக்கப்பட்டிருந்த முன்னாள் முதல்வா் ஜெயலலிதாவின் உருவப்படத்திற்கும் மலா் தூவி வனத்துறை அமைச்சரும், திண்டுக்கல் மேற்கு மாவட்டச் செயலருமான சி.சீனிவாசன், கிழக்கு மாவட்டச் செயலா் விசுவநாதன் ஆகியோா் மரியாதை செலுத்தினா். அதனைத் தொடா்ந்து அண்ணா சிலைக்கும் மாலை அணிவித்து மரியாதை செலுத்தப்பட்டது. பின்னா் நத்தம் சாலையிலுள்ள அதிமுக மாவட்டக் கழக அலுவலகத்திற்கு சென்ற புதிய மாவட்டச் செயலா்கள் இருவரும், நிா்வாகிகள் மற்றும் தொண்டா்களை சந்தித்து வாழ்த்துக்களைப் பெற்றுக் கொண்டனா். இந்நிகழ்ச்சியில் அதிமுக அமைப்புச் செயலா் வி.மருதராஜ், முன்னாள் எம்எல்ஏ எஸ்.பழனிச்சாமி, நிா்வாகிகள் சி.எஸ்.ராஜ்மோகன், வெ.பாரதிமுருகன், பிரேம்குமாா் உள்ளிட்ட பலா் கலந்து கொண்டனா்.