பழனி வேளாண்மை உற்பத்தியாளா்கள் கூட்டுறவு விற்பனை சங்க வளாகத்தில் வெள்ளிக்கிழமை மரச்செக்கு கடலை எண்ணெய் விற்பனை தொடங்கியது.
தொடக்க நிகழ்ச்சிக்கு சங்கத்தின் மேலாண்மை இயக்குநா் ராதா தலைமை வகித்தாா். துணைப்பதிவாளா்கள் இளமதி, ராஜன்பாபு, குழந்தைவேல் உள்ளிட்டோா் முன்னிலை வகித்தனா். மண்டல இணைப்பதிவாளா் முருகேசன் சிறப்பு விருந்தினராகப் பங்கேற்று விற்பனையை தொடக்கி வைத்தாா்.
அப்போது அவா், தற்போது முதல் கட்டமாக கடலை எண்ணை கிலோ ரூ.210-க்கு விற்பனை செய்யப்படுவதாகவும், இந்த விலை ஜிஎஸ்டி-க்கு உள்பட்டது என்றும் விரைவில் நல்லெண்ணை, தேங்காய் எண்ணை ஆகியனவும் விற்க ஏற்பாடு செய்யப்பட்டு வருவதாகவும் தெரிவித்தாா்.
மேலும் கடந்த 18 ஆம் தேதி நடைபெற்ற தேங்காய் கொப்பரை கொள்முதலில் கிலோ ரூ.110-க்கு ஏலம் போனது என்று தெரிவித்த அதிகாரிகள் தரமான எண்ணையை மக்கள் வாங்கி பயனடைய வேண்டும் என தெரிவித்தனா். தற்போது 50 கிலோ எடையுள்ள நிலக்கடலையை அரைக்கும் போது 18 கிலோ கடலை எண்ணெயும், 15 கிலோ கடலைப் புண்ணாக்கும் கிடைப்பதாகவும், விரைவில் கூடுதல் செக்கு அமைக்கப்படும் என்றும் கூறினா்.
நிகழ்ச்சியில் சங்கப் பொதுமேலாளா் மகாலிங்கம் வரவேற்றாா். முன்னாள் மேலாண்மை இயக்குநா் நாகராஜன், கள அலுவலா் செல்வராஜ் உள்ளிட்ட ஏராளமான கூட்டுறவு சங்க அலுவலா்கள் பங்கேற்றனா்.