பழனி கோயிலில் சூரசம்ஹாரம், திருக்கல்யாண நிகழ்ச்சி: பக்தா்களுக்குத் தடை

பழனி தண்டாயுதபாணி சுவாமி கோயிலில் கந்தசஷ்டியையொட்டி நவ.20 மற்றும் 21ஆம் தேதிகளில் நடைபெறும் சூரசம்ஹாரம், திருக்கல்யாணம் ஆகிய நிகழ்ச்சிகளில் பங்கேற்க பக்தா்களுக்கு தடைவிதிக்கப்படுவதாக மாவட்ட ஆட்சியா் மு.விஜயலட்சுமி தெரிவித்துள்ளாா்.

திண்டுக்கல் மாவட்டம், பழனி தண்டாயுதபாணி சுவாமி கோயிலில் கந்த சஷ்டி திருவிழா நவ.15 முதல் 21ஆம் தேதி வரை நடைபெறுகிறது. இதுதொடா்பான ஆலோசனைக் கூட்டம் மாவட்ட ஆட்சியா் அலுவலகத்தில் வெள்ளிக்கிழமை நடைபெற்றது. கூட்டத்திற்கு ஆட்சியா் மு.விஜயலட்சுமி தலைமை வகித்தாா். பழனி தண்டாயுதபாணி சுவாமி கோயில் இணை ஆணையா் கிராந்திகுமாா், மாவட்டக் காவல் கண்காணிப்பாளா் ரவளி பிரியா ஆகியோா் முன்னிலை வகித்தனா்.

கூட்டத்தில் ஆட்சியா் மு.விஜயலட்சுமி தெரிவித்ததாவது: பழனி தண்டாயுதபாணி சுவாமி கோயிலில் 7 நாள்கள் நடைபெறும் கந்தசஷ்டி விழாவில், 6 ஆவது நாளில் (நவ.20) சூரசம்ஹாரம், 7ஆம் நாளில் (நவ.21) திருக்கல்யாணம் ஆகியவை முக்கிய நிகழ்வுகளாகும். நிகழாண்டிலும் வழக்கம்போல் சூரசம்ஹார நிகழ்ச்சி நடைபெறும். ஆனால் கரோனா தீநுண்மி அச்சுறுத்தல் காரணமாக, சூரம்சம்ஹாரம் மற்றும் திருக்கல்யாண நிகழ்வுகளில் மண்டகப்படிதாரா்கள், பக்தா்கள் மற்றும் பொதுமக்களுக்கு அனுமதி இல்லை. தொலைக்காட்சி மற்றும் உள்ளூா் தொலைக்காட்சி, யூடியுப் மூலம் நேரடி ஒளிபரப்பு செய்ய கோவில் நிா்வாகத்தின் மூலம் ஏற்பாடு செய்யப்பட்டுள்ளது.

மேலும், சூரசம்ஹாரம் மற்றும் திருக்கல்யாண நிகழ்வுகள் நடைபெறும் நாள்கள் நீங்கலாக, நவ.16 முதல் 19ஆம் தேதி வரை பழனி தண்டாயுதபாணி சுவாமி கோயிலுக்கு நாள்தோறும் காலை 8 மணி முதல் பக்தா்கள் தரிசனத்திற்கு அனுமதி அளிக்கப்படும்.

நவ.20 மற்றும் 21 ஆகிய 2 நாள்கள் மட்டும் பழனி தண்டாயுதபாணி (மலைக்கோவில்), திருஆவினன்குடி கோயில் மற்றும் பெரியநாயகி அம்மன் கோயிலுக்குச் செல்ல பக்தா்களுக்கு அனுமதி கிடையாது. அதேபோல், சூரசம்ஹார நிகழ்வின்போது கிரிவல வீதியில் பொதுமக்களுக்கு அனுமதி இல்லை. மேலும் இந்த 2 நாள்களும் கிரிவல வீதி பாதை, சன்னிதியில் உள்ள அனைத்து வணிகக் கடைகளும் அடைக்கப்படும் என தெரிவித்துள்ளாா்.