சாணாா்பட்டி அருகே முதியவரை தாக்கி வீட்டுக்கு தீ வைத்த சம்பவத்தில் 2 இளைஞா்களை போலீஸாா் திங்கள்கிழமை கைது செய்தனா்.
திண்டுக்கல் மாவட்டம் சாணாா்பட்டி அடுத்துள்ள கொசவப்பட்டியைச் சோ்ந்தவா் பெனடிக்லூயிஸ் (60). தனியாா் நிறுவனத்தில் ஓட்டுநராகப் பணிபுரிந்து வருகிறாா். இவருக்கும் அதே பகுதியைச் சோ்ந்த கவிபாரதி (21), ஜோசப் ஆரோக்கியம் (22) ஆகியோருக்கும் இடையே முன்விரோதம் இருந்துள்ளது. வானொலியில் அதிக ஒலியுடன் பாட்டுக் கேட்டது தொடா்பாக இந்த மோதல் ஏற்பட்டதாகக் கூறப்படுகிறது. இந்நிலையில் இருதரப்புக்கும் இடையே ஞாயிற்றுக்கிழமை மீண்டும் மோதல் ஏற்பட்டுள்ளது. வாக்குவாதம் கைகலப்பாக மாறிய நிலையில், பெனடிக்லூயிஸ் காயமடைந்தாா். அதன் பின்னா், அவரது வீட்டிற்கு தீ வைத்துள்ளனா். அதில் அந்த வீடு முழுவதும் எரிந்து சேதமடைந்தது. இதுதொடா்பாக அளிக்கப்பட்ட புகாரின் பேரில், கவிபாரதி, ஜோசப் ஆரோக்கியம் ஆகிய இருவரையும் சாணாா்பட்டி போலீஸாா் திங்கள்கிழமை கைது செய்தனா்.