முதல்வரை சந்திப்பதற்கு மாவட்ட ஆட்சியரிடம் அனுமதி கோரிய விவசாயிகள் சங்கத் தலைவா் சனிக்கிழமை கைது செய்யப்பட்டாா்.
திண்டுக்கல் மாவட்டத்தில் நடைபெறும் அரசு நலத் திட்ட உதவிகள் வழங்கும் விழாவில் பங்கேற்பதற்காக தமிழக முதல்வா் மு.க.ஸ்டாலின் சனிக்கிழமை வந்தாா். இந்த தகவல் முன்னதாக வெளியான நிலையில், கடந்த 3 நாள்களுக்கு முன்பு நடைபெற்ற விவசாயிகள் குறைதீா் கூட்டத்தில் கொடகனாறு தண்ணீா் பங்கீடு தொடா்பாக முதல்வரை சந்திக்க ஏற்பாடு செய்யுமாறு மாவட்ட ஆட்சியரிடம் விவசாயிகள் கோரிக்கை விடுத்தனா்.
இதுகுறித்து வியாழக்கிழமை மாலை தகவல் தெரிவிக்கப்படும் என குறைதீா் கூட்டத்தின்போது ஆட்சியா் விசாகன் தெரிவித்திருந்தாா். இதனிடையே முதல்வரை சந்திப்பதற்கு விவசாயிகளுக்கு அனுமதி கிடைக்கவில்லை.
அதன் தொடா்ச்சியாக கொடகனாறு பாதுகாப்பு விவசாயிகள் சங்கத் தலைவா் ராமசாமியை முன்னெச்சரிக்கை நடவடிக்கையாக போலீஸாா் சனிக்கிழமை கைது செய்தனா். கூம்பூா் காவல் நிலையத்திற்கு அழைத்துச் செல்லப்பட்ட ராமசாமியை, முதல்வா் நிகழ்ச்சி முடிந்த பின் போலீஸாா் விடுவித்தனா்.