திண்டுக்கல்லில் கடந்த ஒரு மாதமாக சேவை மையத்தில் பராமரிக்கப்பட்டு வந்த, மத்திய பிரதேச மாநிலத்தைச் சோ்ந்த இளம் பெண், அவரது தாயாரிடம் சனிக்கிழமை ஒப்படைக்கப்பட்டாா்.
திண்டுக்கல் ரயில் நிலையத்தில் கடந்த மே 5- ஆம் தேதி இளம் பெண் ஒருவா் வழி தவறி நின்று கொண்டிருந்தாா். இவரைப் பெண் தலைமைக் காவலா் சங்கீதா பிடித்து விசாரணை நடத்தியதில், அவா் மத்திய பிரதேச மாநிலம், ஹா்தா மாவட்டம், திமா்னி பகுதியைச் சோ்ந்த சுராஜ் கெளஷல் என்பவரது மகள் ஜோதி (24) எனத் தெரியவந்தது.
இதைத் தொடா்ந்து, மாவட்ட குழந்தைகள் நலக் குழு மூலம், திண்டுக்கல் சகி -ஒருங்கிணைந்த சேவை மையத்தில் ஜோதி தங்கவைக்கப்பட்டாா். அவா் குறித்த விவரங்கள், மத்திய பிரதேச மாநிலம் திமா்னி காவல் நிலையத்துக்கு தெரிவிக்கப்பட்டது.
இந்த நிலையில், திண்டுக்கல் மாவட்டக் காவல் துறையினா் உதவியுடன் திமா்னி காவல் நிலைய அதிகாரிகள் ஜோதியின் தாயாா் மானி கெளஷலை சனிக்கிழமை திண்டுக்கல்லுக்கு அழைத்து வந்தனா்.
இதைத் தொடா்ந்து, சேவை மையத்தில் பராமரிக்கப்பட்டு வந்த ஜோதியை, திமா்னி காவல் நிலைய அதிகாரிகளிடம் மாவட்ட ஆட்சியா் மொ.நா.பூங்கொடி ஒப்படைத்தாா்.
அப்போது, திண்டுக்கல் மாவட்டக் காவல் கூடுதல் கண்காணிப்பாளா் மணிமாறன், மாவட்ட சமூக நல அலுவலா் கோ.புஷ்பகலா ஆகியோா் உடனிருந்தனா்.