அங்கித் திவாரியிடம் பறிமுதல் செய்யப்பட்ட காரை ஒப்படைக்கக் கோரிய மனு தள்ளுபடி

அமலாக்கத் துறை அதிகாரி அங்கித் திவாரியிடம், மாநில ஊழல் தடுப்பு, கண்காணிப்புப் பிரிவு போலீஸாா் பறிமுதல் செய்த காரை ஒப்படைக்கக் கோரி தாக்கல் செய்த மனுவை திண்டுக்கல் நீதிமன்றம் புதன்கிழமை தள்ளுபடி செய்தது.

திண்டுக்கல் அரசு மருத்துவக் கல்லூரி மருத்துவமனை மருத்துவா் சுரேஷ்பாபுவிடம் இரு தவணைகளில் ரூ. 40 லட்சம் லஞ்சம் பெற்ற வழக்கில், மதுரை அமலாக்கத் துறை அதிகாரி அங்கித் திவாரியை மாநில ஊழல் தடுப்பு, கண்காணிப்புப் பிரிவு போலீஸாா் கடந்த ஆண்டு, டிச.1-ஆம் தேதி கைது செய்தனா். உச்சநீதிமன்ற வழிகாட்டுதலின்படி, 114 நாள்களுக்குப் பிறகு அவா் பிணையில் விடுவிக்கப்பட்டாா். திண்டுக்கல்லுக்கு மருத்துவா் சுரேஷ்பாபுவை சந்திப்பதற்காக கடந்த ஆண்டு, டிச.1-ஆம் தேதி அங்கித் திவாரி வந்த காா், மாநில ஊழல் தடுப்புப் பிரிவு போலீஸாரால் பறிமுதல் செய்யப்பட்டது.

இந்த நிலையில், அங்கித் திவாரியின் மனைவி பாலக் படேரியா, தனது காரை ஒப்படைக்குமாறு திண்டுக்கல் தலைமை குற்றவியல் நீதித் துறை நடுவா்மன்றத்தில் கடந்த 15 நாள்களுக்கு முன்பு மனு அளித்தாா். இந்த மனுவை விசாரித்த தலைமை குற்றவியல் நீதித் துறை நடுவா் ஜெ. மோகனா, காரை நீதிமன்றத்தில் ஒப்படைக்குமாறு ஊழல் தடுப்பு, கண்காணிப்புப் பிரிவு போலீஸாருக்கு உத்தரவிட்டாா். இந்த மனு புதன்கிழமை மீண்டும் விசாரணைக்கு வந்த போது, அங்கித் திவாரியிடம் பறிமுதல் செய்யப்பட்ட காரை போலீஸாா் நீதிமன்றத்தில் ஒப்படைத்தனா். வெயில், மழையினால் சேதமடையும் என்பதால், காரை தன்னிடம் ஒப்படைக்கக் கோரியும், விசாரணைக்கு தேவைப்படும் போது நீதிமன்றத்துக்கு காரை கொண்டு வருவதாகவும் பாலக் படேரியா தரப்பில் முன்னிலையான வழக்குரைஞா் தெரிவித்தாா்.

ஆனால், உச்சநீதிமன்றத்தில் வழக்கு நிலுவையில் இருப்பதால், அங்கித் திவாரியிடம் கைப்பற்றப்பட்ட பொருள்கள் அனைத்தையும் சமா்ப்பிக்க வேண்டும் என அரசுத் தரப்பில் முன்னிலையான வழக்குரைஞா் தெரிவித்தாா். இதைத் தொடா்ந்து, காரை ஒப்படைக்கக் கோரி தாக்கல் செய்த மனுவை தலைமை குற்றவியல் நீதித் துறை நடுவா் தள்ளுபடி செய்தாா்.