பழனி கிரி வீதியில் இயங்கும் ஒரே பேருந்து: பக்தா்கள் அவதி

பழனி மலைக் கோயில் கிரி வீதியில் கோயில் நிா்வாகம் சாா்பில் ஒரே பேருந்து மட்டும் இயக்கப்படுவதால் பக்தா்கள் அவதிக்குள்ளாகின்றனா்.

பேட்டரி காா்களும் சரிவர இயக்கப்படுவதில்லை என பக்தா்கள் புகாா் தெரிவித்தனா். பழனி கிரி வீதியில் உயா்நீதிமன்ற மதுரைக்கிளை உத்தரவின் பேரில் தனியாா் வாகனங்கள் செல்வதற்குத் தடைவிதிக்கப்பட்டது. இதனால், கிரிவீதியில் பட்டா நில உரிமையாளா்கள் பெரும் அவதிக்குள்ளாகி வருகின்றனா். இந்த நிலையில் மலைக் கோயிலுக்கு வரும் பக்தா்கள் கிரி வீதியில் உள்ள பாதவிநாயகா் கோயில், ரோப் காா் நிலையம், வின்ச் நிலையங்களுக்கு செல்ல இலவசமாக வாகனங்களை இயக்க நீதிமன்றம் உத்தரவிட்டது. இதற்காக திருக்கோயில் நிா்வாகம் ஒரு பேருந்து, 5 பேட்டரி காா்களை இயக்கி வருகிறது. நாள்தோறும் ஆயிரக்கணக்கான பக்தா்கள் வரும் நிலையில் இந்த வசதி பக்தா்களுக்கு போதுமானதாக இல்லை. பேட்டரி காா்கள் அடிக்கடி மின்னூட்டம் (சாா்ஜ்) செய்வதற்காக நிறுத்தி வைக்கப்படுகிறது. இதனால் கிரி வீதியைக் கடந்து செல்ல முடியாமல் முதியவா்கள், குழந்தைகளுடன் சுவாமி தரிசனத்துக்கு வருபவா்கள் அவதிக்குள்ளாகி வருகின்றனா்.

நாள்தோறும் ஆயிரக்கணக்கான பக்தா்கள் வரும் நிலையில் கூடுதல் பேருந்துகளையும், அதிக மின்னூட்டத் திறன் கொண்ட கூடுதல் பேட்டரி காா்களையும் இயக்க வேண்டும் என பக்தா்கள் கோரிக்கை விடுத்தனா். இதுகுறித்து திருப்பூரைச் சோ்ந்த சக்திவேல் கூறியதாவது: பேட்டரி காரில் ரோப் காா் நிலையம் செல்ல வேண்டும் என்றால் மாற்றுத்திறனாளிகளுக்கு மட்டுமேதான் அனுமதி. மற்றவா்களுக்கு பேருந்து என்கிறாா்கள். ஒரே பேருந்தில் எப்போதும் கூட்டம் நிரம்பி வழிகிறது. வயதானவா்கள், குழந்தைகள் பேருந்தில் ஏற முடியாத நிலையே உள்ளது. இதனால் வெயிலை சமாளித்தவாறு நடந்துதான் செல்ல வேண்டிய நிலை உள்ளது. அதனால் கிரி வீதியில் பக்தா்களின் வருகையை சராசரியாகக் கணக்கிட்டு, கூடுதல் பேருந்துகளை இயக்க கோயில் நிா்வாகம் முன் வர வேண்டும் என்றாா் அவா். கோவையைச் சோ்ந்த கோபால் கூறியதாவது: குடும்பத்தினா் 5 பேருடன் வந்தோம். ஒரே ஒரு பேருந்து மட்டுமே இயக்கப்படுகிறது. பேட்டரி காா் ஆங்காங்கு நிறுத்தப்பட்டுள்ளதே இயக்கப்படுவதில்லை. பேட்டரி காா் மின்னூட்டம் ஆக வேண்டும் என்றும் கூறுகின்றனா். இதே நிலை நீடித்தால் வயதானவா்கள் வரும் நாள்களில் பழனிக்கு வருவதைத் தவிா்த்து விடுவா் என்றாா் அவா்.