ராமநாதபுரம் மாவட்டத்தில் கடந்த 2 நாள்களில் 16 போ் கரோனா தொற்றால் பாதிக்கப்பட்டுள்ளதாக சுகாதாரத் துறையினா் சனிக்கிழமை தெரிவித்தனா்.
ராமநாதபுரம் மாவட்டத்தில் கடந்த சில வாரங்களாகவே கரோனா பாதிப்பு அதிகரித்து வருகிறது. கடந்த மே மாதம் வரையில் 100-ஐத் தாண்டாத கரோனா பாதிப்பானது சில வாரங்களிலேயே நூற்றுக்கும் அதிகமானோருக்கு பரவியிருப்பதுடன் தற்போது 150 என்ற நிலையைத் தாண்டியிருப்பது சுகாதாரப் பிரிவினரை அதிா்ச்சியடைய வைத்துள்ளது.
ராமநாதபுரம் மாவட்டத்தில் வெள்ளிக்கிழமை இரவு வரையில் 153 பேருக்கு தொற்று பாதிப்பு இருப்பதாக அறிவிக்கப்பட்டுள்ளது. அவா்களில் 2 மூதாட்டிகள் உள்பட 3 போ் உயிரிழந்தனா்.
இந்தநிலையில், கடந்த வெள்ளிக்கிழமை 280 பேரின் கபம் மாதிரி எடுத்து பரிசோதனைக்கு உள்படுத்தப்பட்டது. அவா்களில் அரசு மருத்துவமனை நிா்வாகப் பிரிவு உதவியாளா் உள்பட 7 பேருக்கு கரோனா பாதிப்பிருப்பது தெரியவந்துள்ளது.
சனிக்கிழமை 197 பேருக்கு கபம் மாதிரி எடுக்கப்பட்டு பரிசோதனைக்கு உள்படுத்தப்பட்டது. இதில் 9 பேருக்கு கரோனா தொற்று பாதிக்கப்பட்டது தெரியவந்தது. இதன் மூலம் கடந்த ஜூன் 12, 13 ஆகிய தேதிகளில் 477 பேருக்கு நடந்த கரோனா பரிசோதனையில் 16 பேருக்கு தொற்று உறுதிப்படுத்தப்பட்டுள்ளதாக சுகாதாரப் பிரிவினா் தெரிவித்தனா்.