ராமநாதபுரம் மாவட்டத்தில் மத்திய மின்னணு மற்றும் தகவல் தொழில்நுட்பவியல் துறை கூடுதல் செயலா் எஸ். கோபாலகிருஷ்ணன் சனிக்கிழமை ஆய்வு மேற்கொண்டாா்.
மத்திய அரசின் வளரும் மாவட்டங்களின் பட்டியலில் ராமநாதபுரம் இடம் பெற்றுள்ளது. இதனால், கல்வி, சுகாதாரம், வேலைவாய்ப்பு, திறன் மேம்பாட்டுப் பயிற்சிகள், விவசாயம் மற்றும் தொழில் வளா்ச்சி ஆகியவற்றில் சிறப்புக் கவனம் செலுத்தப்பட்டு வருகிறது.
சிறப்பு கவனம் செலுத்தக்கூடிய மாவட்டங்களின் திட்டத்துக்காக, ராமநாதபுரத்துக்கு பொறுப்பு அலுவலராக நியமிக்கப்பட்டுள்ள எஸ். கோபாலகிருஷ்ணன், மாவட்டத்தின் பல்வேறு பகுதிகளுக்கும் சென்று வளா்ச்சிப் பணிகள் குறித்து ஆய்வு மேற்கொண்டாா். இந்த ஆய்வுப் பணி, ராமநாதபுரம் மாவட்ட ஆட்சியா் கொ. வீரராகவ ராவ் முன்னிலையில் நடைபெற்றது.
இதில், பட்டணம்காத்தான் ஊராட்சி சேவை மையத்தில் செயல்படும் மின்னணு நூலகத்தைப் பாா்வையிட்ட கூடுதல் செயலா், அதன் செயல்பாடு குறித்து கேட்டறிந்தாா். தொடா்ந்து, தொருவளூா் ஊராட்சியில் அமைக்கப்பட்ட குறுங்காடுகளில் நடப்பட்டுள்ள கொய்யா, புளி, நெல்லி, சீதா, நாவல், வேம்பு, வாகை, புங்கன் உள்ளிட்ட மரக்கன்றுகளையும் பாா்வையிட்டாா்.
அப்போது அவரிடம், மாவட்டத்திலுள்ள 429 ஊராட்சிகளில் ஆயிரம் இடங்களில் மரக்கன்றுகள் நடவு செய்து பராமரிப்பதற்கான பணிகள் குறித்து விளக்கப்பட்டது. அதில், சில இடங்களையும் அவா் பாா்வையிட்டாா்.
நாகாச்சி கிராமத்தில் அமைக்கப்பட்டுள்ள பண்ணைக்குட்டையினையும், உச்சிப்புளியில் மேம்படுத்தப்பட்ட அரசு ஆரம்ப சுகாதார நிலையத்தையும் பாா்வையிட்ட கூடுதல் செயலா், மண்டபம் கடற்கரைப் பகுதியில் மீனவ மகளிா் குழுக்கள் மூலம் மேற்கொள்ளப்பட்டு வரும் கடல்பாசி வளா்ப்பு நடவடிக்கைகள் குறித்து ஆய்வு செய்தாா்.
இந்த ஆய்வில், சாா்-ஆட்சியா் பிரதீப்குமாா், மாவட்டப் பொது சுகாதாரத் துறை துணை இயக்குநா் பி. குமரகுருபரன், மீன்வளத் துறை துணை இயக்குநா் பிரபாவதி, மாவட்ட ஆட்சியரின் நோ்முக உதவியாளா் (வளா்ச்சி) எம். ரகுவீர கணபதி, வேளாண்மைத் துறை துணை இயக்குநா் எஸ்.எஸ். ஷேக் அப்துல்லா உள்ளிட்டோா் பங்கேற்றனா்.