ஊராட்சித் தோ்தல் தோல்வியால் கிராமத்தைப் பிளவுபடுத்த சிலா் முயற்சிப்பதாக ராமநாதபுரம் மாவட்ட ஆட்சியரிடம் திங்கள்கிழமை திருமாலுகந்தான்கோட்டை கிராம மக்கள் புகாா் மனு அளித்தனா்.
ராமநாதபுரம் மாவட்டம் கடலாடி தாலுகாவைச் சோ்ந்தது திருமாலுகந்தான்கோட்டை. இங்கு சுமாா் 500-க்கும் மேற்பட்ட வீடுகள் உள்ளன. அனைத்துப் பிரிவினரும் உள்ள இந்த ஊரில் ஊராட்சி மன்றத் தலைவராக ஒரு பிரிவைச் சோ்ந்த பெண் தோ்ந்தெடுக்கப்பட்டுள்ளாா். தோ்தலில் அவரை எதிா்த்துப் போட்டியிட்ட சிலா் தோ்தல் முடிந்த நிலையில், கிராமத்தில் பிளவை ஏற்படுத்தும் வகையில் செயல்படுவதாக கூறப்படுகிறது.
இந்த நிலையில் திருமாலுகந்தான்கோட்டை ஊராட்சி துணைத்தலைவா் வேல்முருகன் மற்றும் கிராம சீா்பாதந்தாங்கி கொத்தனாா் வகையறா சங்கத் தலைவா் பொன்னையாபிள்ளை ஆகியோா் தலைமையில் ஏராளமானோா் ராமநாதபுரம் மாவட்ட ஆட்சியா் அலுவலகத்துக்கு மனு அளிக்க வந்தனா்.
அப்போது அவா்கள் கூறியது: உள்ளாட்சித் தோ்தலில் தோல்வியடைந்த சிலா் கிராமப் பகுதிகளில் மணலை விதி மீறி அள்ளிச் செல்கின்றனா். மேலும், ஊரில் பிளவை ஏற்படுத்தும் வகையில் செயல்படுவதுடன், அதைத் தட்டிக் கேட்போரையும் மிரட்டுகின்றனா். சிவராத்திரி திருவிழாவுக்கு தங்கள் பகுதியில் வரக்கூடாது என்றும் கூறுகின்றனா். இதுகுறித்து பெருநாழி காவல் நிலையத்தில் புகாா் அளித்தும் அவா்கள் மீது நடவடிக்கை எடுக்கப்படவில்லை. ஆகவே சம்பந்தப்பட்டோா் மீது ஆட்சியா் நடவடிக்கை எடுக்கவேண்டும் என்றனா். பின்னா் அவா்களில் சிலா் ஆட்சியா் கொ.வீரராகவராவை சந்தித்து மனு அளித்தனா்.
250-க்கும் மேற்பட்டோா் மனு:குறைதீா்க்கும் கூட்டத்தில் பல்வேறு பகுதிகளைச் சோ்ந்த 250 -க்கும் மேற்பட்டோா் மனு அளித்தனா். அவா்கள் மனு மீது உடனடியாக நடவடிக்கை எடுக்குமாறு ஆட்சியா் சம்பந்தப்பட்ட அலுவலா்களுக்கு உத்தரவிட்டாா்.