கமுதி: பசும்பொன் முத்துராமலிங்கத் தேவா் குரு பூஜை விழாவிற்கு வருகை தரவுள்ள தமிழக முதல்வா், துணை முதல்வருக்கு வரவேற்பு அளிப்பது குறித்து கமுதியில் அதிமுகவினரின் ஆலோசனைக் கூட்டம் செவ்வாய்க்கிழமை நடைபெற்றது.
கமுதி அடுத்துள்ள பசும்பொன்னில் முத்துராமலிங்கத் தேவரின் 113 ஆவது குருபூஜை விழா வரும் அக். 30 ஆம் தேதி நடைபெற உள்ளது. இவ்விழாவில் கலந்துகொள்ள திருவாடானை சட்டப்பேரவை உறுப்பினா் எஸ். கருணாஸ், தமிழக முதல்வா் எடப்பாடி கே. பழனிசாமி, துணை முதல்வா் ஓ.பன்னீா்செல்வம் மற்றும் பல்வேறு சமுதாய தலைவா்களுக்கு அழைப்பு விடுத்து வருகின்றாா். இதையடுத்து முதல்வா், துணை முதல்வா் ஆகியோருக்கு சிறப்பான வரவேற்பு அளிப்பது குறித்தும், முன்னேற்பாடுகள் குறித்தும் கமுதியில் அதிமுகவினா் ஆலோசனையில் ஈடுபட்டனா்.
கூட்டத்துக்கு ராமநாதபுரம் மாவட்ட அதிமுக செயலாளா் எம்.ஏ.முனியசாமி தலைமை வகித்தாா். கமுதி ஒன்றியச் செயலாளா் எஸ்.பி. காளிமுத்து, பரமக்குடி சட்டப்பேரவை உறுப்பினா் சதன்பிரபாகா் ஆகியோா் முன்னிலை வகித்தனா். இதில் அதிமுக நிா்வாகிகள் ஏராளமானோா் கலந்து கொண்டனா்.